- Mahmuaka Chhakchhuak
Kumdangah pawh Baptist Church of Mizoram chuan an lehkhabu zawrhte man tlawm zawka zawrh chhuahna hun an lo siam tawh thin a, kuminah pawh Nov. 13 – 17, 2023 chhung khan siam lehin a duh apiangte tana lei theih turin tlawm tak takin an pho chhuak a, an zar zo berte zingah ka tan ka ring hial a ni.
Hetianga lehkhabu man tlawm tak taka pho chhuah hi thil harsa tak niin ka hria a, BCM kohhranin an buatsaih hi a lawmawm hle a ni. A thente chu 80% te hial tihtlawm a niin a zavaiin a tlawm thei ang bera zawrhchhuah a nih avangin a leitu tan a manhla thin viau a. Kumina hetianga an phochhuah leh tumah pawh hian kal ngei ka tum a, amaherawhchu a hun tak hi ka lo theihnghilh tlat mai a, a ni khatna chu ka kal loh phah ta a. A ni hnihnaah chuan ka hriat veleh kal nghalin ka hnaih ber Bazar Baptist Bookroom chu ka pan a, ka han enkual thuak thuak a, ka duh ang lehkhabu ka hmuh loh avangin a hmunpui ber zawk Serkawn lamah ka tlan chho leh ta a. Serkawn Bookroom-ah nghe nghe chuan lehkhabu pawh alo thahnem tham deuh bawk a, ka awm rei phah hle a ni.
Hmanhmawh miah loin ka thlir kual a, In lamah lehkhabu dahna nei tha deuh ila chuan ka lei teuhin ka ring a, chuti chung chuan hengte hi ka lei ta tho a, ka leina man zat nen han tarlang ila;
Israel Hnam Chanchin – Rs. 20/-
MKHC Chanchin – Rs. 20/-
Thangtharte tana Thuro Chhunkhawm – Rs. 10/-
Ramsate Zalenna – Rs. 10/-
Krismas Thawnthu Part II – Rs. 10/-
Zoram Bawmtu – Rs. 20/-
Chhailai Di – Rs. 20/-
Korinth Lekhathawn I Chhuizauna – Rs. 20/-
Mizoram Baptist Kohhran Chanchin – Rs. 20/-
Rawngbawltu Ropui Rev. Saiaithanga – Rs. 30/-
Mi Thianghlimte Chanchin – Rs. 20/-
Kal siam i rel ang – Rs. 80/-
Khawvel Harhna Ropuite – Rs. 30/-
Kan Ram a dam lo – Rs. 10/-
An va hlu em! – Rs. 10/-
Kum 75 chhung BCM Mission Rawngbawlna Chanchin – Rs. 50/-
Selah – Rs. 20/-
Zoram Rahbi – Rs. 220/-
Heng zawng hi ka lei a ni a, ka lehkhabu leite hi a man tlawm apiang ka thlang tihna a ni hauh lo a, uluk taka ka han keu a, ka chhiar hnua leite an ni. Lehkhabu pakhat, Chhailai Di lehkhabu erawh hi chu Pu RK. Lalhluna ziak a nih vang hrim hrima lei ka ni a, In ka thlen hnuin amah pawh ka be nghal a, a lehkhabu chanchin min hrilhin thawnthu tak tak a nih zia min hrilh mai bakah thawnthu satliah lo tak a nih dan min hrilh bawk a, ka inchhir lo hle mai. SELAH lehkhabu pawh hi In ka thlen hnuin ka han chhiar thuak thuak a, awlsam taka chhiar zawh mai theih turin alo ziak bawk nen ka duh aia rei mah tur hi ka chhiar lehnghal a, a khawilai thu mai pawh chu lem duak duak chi niin a tha hlawm hle mai a. Duhsak zawngte chhiar ve atan ka it em avangin leh an chhut thar leh mai ka rin loh avangin Bookroom nghaktute number ka thiante ka han dil a, min pek hnu chuan SELAH lehkhabu chu Bu 5 min lo dah sak turin ka chah nghal nghe nghe a.
Ka lehkhabu leite hi a mal mala sawi vek pawh ka chak hle nain helai atan chuan a thui lutuk a hlauhawm deuh bawk si avangin tlemte chauh han sawi leh ila. An va Hlu em tih James Dokhuma ziak hi chhut thar leh tlak hial a niin a bu chhung thu hi sawi uar tlak tak pawh a ni. Nungchangte leh mihringte inpumkhat dan min hrilhin kan inmamawh tawn dan min hrilh hi a bengvarthlak a, ramsa leh sava kan that mai mai thin hi sim nghal a tul zia pawh a sawi a. Chutiang bawkin Ramsate Zalenna tih lehkhabu F. Lianchhinga ziak pawh hi mitin tana chhiar chi niin lehkhabu hlu tak a ni. Ramsa chanchin bengvarthlak tak taka a ziak mai bakah an hlutna a ziak te hi la chhiar ve lo tana chhiar ngei ngei chi a ni. Brig. Sapliana, kum upa tawh lam a nih hnua a ziak Thangtharte tana Thuro Chhunkawm a tih lehkhabu hi a bu hming ang takin Thuro tling a ni bawk a. Hriatna tipungtu a nih mai bakah chhinchhiah tlak tak tak a ziak a, chhiar ve ula ka duh hle mai. Kum 75 chhung BCM Mission Rawngbawlna Chanchin tih lehkhabu phei hi chu phek 661 laia chhah niin Rs. 50/- leka an hralh phal hi thil lawmawm tak a ni. Eng emaw zawngin lo ngai lo ula, he lehkhabu kher hi chu Rs. 200/- pawhin ka lei ngam zan laia Rs. 50/- leka lei theih a ni hi ka lawm hle mai a, he lehkhabu pakhat vang ringawt pawh hian lawmthu ka sawi duh.
Lehkhabu tha tak tak a tam a, tunah hian a ziaktute hian ziak rih tawh lo pawh nisela kan mamawh tawk tur lehkhabu chu a awm tawh hial awm e. Chutiang a nih laiin a chhiartu lam erawh kan thatchhe sawt zel mai thung si avangin lehkhabu hlu leh tha tak takte pawhin ngaihsak an hlawh ta meuh lo. Hei hi a pawi hle mai a, lehkhabu chhiar uar leh tura inzirtirna pawh kan mamawh hle a ni. BCM Kohhranin hetianga man tlawm tak taka an pho chhuak hi thil lawmawm tak a ni a, a hunlaia lei ve hman lo leh lei tum reng reng lote, lehkhabu pho chhuah tih pawh hre lo zawng zawngte nen hian han chhiar theuh ila ka duh hle a ni.
Reduction Sale buatsaihtu BCM rawngbawlna pawimawh tak hi ka tan chuan malsawmna a va han ni chiang tak em.