AIZAWL: Hnahlan Forest Range Office chuan Inrinni khan dan loa sazuk tihhlum halralna hun DFO Office Complex-ah an buatsaih a, Champhai District Honourary Wildlife Warden Lalhlupuia’n sazuk hi a hal ral.
Hnahlan Forest Range Office-a thawktute chuan November 23, 2023 zan khan dan lova sazuk tihhlum hi an hmu chhuak a, a tihlumtu ni a rinte pawh man an ni.
Sazuk tihlumtu ni a rinhlelhte hi mi pathum an ni a, Thangpui Luia inbual tura an kalin sazuk ruang an chhar niin an sawi. An pathum hian Hnahlan Forest Range Officer, staff leh Wildlife Protection Squad-ten an man.
Zirtawpni khan heng mi pathum leh sazuk hi Champhai District Chief Judicial Magistrate hmaah hruai an ni a. Mi pathumte hi thu zawh fiah an nih hnuah PR Bond ziak tira chhuah lailawk an ni a, sazuk ruang hi vawinah halral a ni thung.