Mamit district chhunga Nalzawl khua chu Mizorama oilpalm thar chhuak tam ber an ni.
Mizorama oilpalm thar chhuak tam ber khua, Nalzawl hian Mizoramin kum tina oilpalm a tharchhuah zaa 20 a thar chhuak a. He khuaa cheng zatve deuhthaw chu oilpalm-a innghat an ni a, huan nei zau deuhte phei chuan thla tin Rs. nuai 2 – 7 te an a lut a, a la lut tlem pawl pawhin cheng singhnih – sing nga te an la lut a, oilpalm huan nei ve lo, ni tin inhlawhfate pawhin huanah hian an thawh sen loh inhlawhna kumtluanin an hmu a ni.
Hetiang khawpa oilpalm-a hma la nasa khua an nih avang leh an khaw mipui zawng zawng deuhthaw innghahna a nih avang te, Mizoram mai ni lo, India hmarchhakah pawh a khaw bila tharchhuak hnem ber an nih avangin Nalzawl VCP Rinchungnunga chuan an khua chu Oilpalm Village a nih thu a sawi a ni.
Mizoramah hian sorkar hmalaknain kum 2005 vel atangin oilpalm chin tan a ni a, a tirah company pathum – Godrej Agrovet Ltd, Ruchi Soya leh 3F ten district hrang hrangah hma an la a, Zoram hmun tam takah heng company-te hian farmer-te hlawhtlinpui lo mah se, Godrej Agrovet Ltd hmalakna Kolasib leh Mamit district-a farmer-te chuan vawiin thlengin oilpalm hi hlawhtling takin an kalpui a ni.
Heng district pahniha oilpalm tharchhuahte chu Bukvannei khuaa Godrej Agrovet Ltd oilpalm mill-ah hralhin company hian a hriak pawh kum tin metric tonne tam tak Mizoram pawnah an thawnchhuak reng a ni.