Manipur-a cheng Zo hnahthlakten Aizawl leh Lamka, Manipur inkara helicopter service chu chhawr tangkai hle mah se pakhat chauh thlawh tur a nih avangin mamawh a phuhru zo lo a; ticket indaih lohna a nasa hle.
Civil Aviation Wing hotuten The Zozam Times an hrilh danin September 27, 2023 atang khan Aizawl leh Lamka inkarah helicopter hi a service tan a, harsatna awm loin tluang taka kalpui a ni.
Hetihlai hian helicopter hmanga zin duh erawh an thahnem hle a, ticket indaih lohna a nasa hle a ni.
Helicopter hi kar khatah ni khat chauh a thlawk thin a, hei bakah hian mi 10 bak an leng lo a ni.
Ticket inchan lohna a nasat avang hian ticket hi book pawh an rem ti lo niin Civil Aviation Wing hotute chuan an sawi a, “Helicopter hi ni tin pawh service se a chuang tur hi an khah thap reng kan ring a, chutiang khawp chuan hman tangkai a ni,” an ti.
Tar lan tawh thin angin Manipur-a chi leh chi inkara buaina a chhuah hnuah Churachandpur district-a cheng Zo hnahthlakte chu Imphal-ah an kal thei lo a, Mizoram chu mamawh an lamna, damlote pawh an hruai thinna a nih bakah India ram khawpui zawka an zin dawn pawhin Aizawl kaltlangin an kal a ngai a, hemi avang hian Lamka leh Aizawl inkarah helicopter thlawhtir turin sorkar laipui an ngen a, an duh ang hian helicopter hi thlawhtir ni mah se pakhat chauh a thlawh avangin mipui mamawh erawh a phuhru zo lo hle thung a ni.
Mizorama helicopter service chungchang zawhna chhang bawkin Civil Aviation Wing hotute chuan, tun dinhmunah ni tin hmun thumahte a thlawk kual thin tih sawiin, regular taka a service-na chu khaw 15-ah a nih thu leh heng bak khaw dangahte pawh thlawk thei turin ruahmanna awm mah se passenger an awm mumal ngai loh avangin an thlawh khât thu an sawi rualin Champhai chu passenger tamna ber a nih thu an sawi a ni.
Thudawn danin, Mizoram chhunga helipad-te enkawla chei thatna tur hian sorkar atangin sum dawn a awm ngai lo a, hengte avang hian helipad-te hi a tha tawk lo hle a, hemi avang hian Directorate General of Civil Aviation (DGCA) duh dan angin enkawl a ni loh phah.