Aizawl: Bairabi leh Sairang inkar rel kawng siam mek chu harsatna hrang hrang avangin kuminah zawh hman a ni dawn lo a, October, 2024 hian zawh fel vek tum a ni.
Rel kawng siam hna enkawltuten an sawi danin kilometre 51.38-a thui hna hi kumin March thlaah zo fel tura ruahman ni mah se duhthusam anga hnathawh a chak theih loh avangin zawh hman a ni lo a, nakum March thlaah chuan zawh fel vel tumin ruahmanna nei leh mah se kumin August 23-a Sairang Section-ah lei dawh lai a chim avangin a hun sawn leh a ni a, thawktute chuan nakum October thlaah chuan zawh fel tum a nih thu an sawi.
Rel kawng siamtute chuan hnathawh a chak loh chhan sawiin, “Mizoramah fur ruah tui tlak chhung a rei a, lei laih tur leh verh ngai, lei (bridge) dawh tur a tam bawk nen kum khat chhunga hnathawh theih hun a tlem avangin a hun takah zawh hman a ni lo,” an ti a; rel kawng siam mekah hian leiverh (tunnel) 32 a awm a; lei dawh ngai 55 zet a awm bawk niin an sawi a. Rel kawngah hian km 12 atanga 15 inkar dan zelah rel station awm tura ruahman a ni a, hei vang hian km 51 chhung lek ni mah se station pali siam thar a ngai tih an sawi a. Tuna ruahmanna an siam danah chuan Bairabi leh Kawnpui Station inkar chu nakum March thlaah zawh fel an tum a, Kawnpui Station leh Sairang inkar chu nakum Oct thlaah zawh fel tumin, a vaia zawh fel a nih hunah hawn tur a ni dawn tih an sawi.
Railway hotute chuan Mizorama rel service tur chu changkang tak a ni dawn tih te, vawi khatah bungrua leh mihring a phur thei nghal dawn tih te an sawi a, hnathawktu lak chungchangah thawktu nghet leh officer chin chu exam leh interview hmangin an la thin a; thawktu dang erawh chu a nghet loa lak an ni a; chutah chuan Mizo thalai, hnam dang be thei tur tan hna a inhawng nasa dawn a; chuvangin, Mizoten tawng dang thiam lo tum se a chhenfakawm ang tih a sawi bawk a ni.
Tar lan tawh thin angin rel kawng siam hna hi kum 23 kal ta, 2000 atang khan survey neih tan a ni a, kum sarih chhung survey chi hrang hrang zawh fel a nih hnuah rel kawng siam nan Rs. vbc 2,839.34 ruahman a ni a. Railway ministry chuan 2008-2009 khan pawisa a pe chhuak nghal a. Estimate siam lai leh hnathawh hun laia thil man sang leh ruahman lawksa tihdanglam a awm avangin Bairabi leh Sairang inkar rel kawng siamna tur hi Rs. vbc 6,529.04-ah tihsan belh leh a ni.