Red Bull Racing star, kumin Formula 1 world champion Max Verstappen chuan hnehna taka a thunun season chu pakhatna niin a khar a, intlansiak hnuhnung ber Abu Dhabi Grand Prix-ah a tlan chak ber.
Kumin Dutch driver hian Formula 1 chanchin a season khat driver pakhatin a thunun hneh ber tum a hmang a, intlansiak 22 awm atangin vawi 19 a chak.
Yas Marina Circuit-ah hian pahnihna atanga bul tan Charles Leclerc chuan intlansiak tan veleh Verstappen hi nawr viau in tum hnih lai lehpel hman thelhin an inum a, amaherawhchu car nei tha zawk Verstappen-a’n a dinhmun tha humin lap khatnaa an innawr bak tuman an nawr buai pha tawh lo.
Red Bull Racing car khalhtu dang Sergio Perez chuan chu pahnihnaah tlan thleng mahse second nga hremna pek a nih avangin Leclerc hi pahnihna a ni a. Mercedes driver George Russell chu pathumna a ni.
- Season chungnung
Kuminah Verstappen-a’n season ropui a hman atangin record a siam hnem.
Season khat a intlansiak a hnehna chang hnem ber niin vawi 19 a chak a, dawhsan lawn ngun ber ni bawkin tum 21 a lawn.
Kartawpah ‘hat-trick weekend’ a hman tum 11-na ni bawkin hnehna a chan bakah, pole position leh fastest lap a nei vek.
F1 chanchin a season khat chhunga lap sang khat chuan hma hruai thei hmasa ber a ni a. Lap 1003 hma hruaiin kum 1988 season a driver ropui Alain Prost leh Ayrton Senna ten McLaren tana season ropui tak an hman a an hmahruaina lap belhkhawm nen a inzat chiah.
Verstappen chuan, “Season ropui, hriat reng tawh tur a ni. RB19 car a tawpna atana ka khalh a ni tih intlansiak tawp lama ka hriat khan ngaihtuahna a kal thui duh hle. He car leh kan team hian thil tam tak min tihsak a, hlawhtlinna ropui tak tak ka neih theih chhan a ni.”
“Red Bull Racing team pumpui chungah lawmthu ka sawi duh a, kum duhawm tak kan hmang.” tiin a sawi.