Juventus leh Inter Milan ten Serie A hmahruaitu nih inchuhin football an khel a, goal khat ve ve inpe in an inhnehtawk.
Pathianni zanah Turin a Allianz Stadium-ah pahnihna a awm Juve in hmahruaitu Inter an mikhual a. Minute 27-naah goal an khung.
Federico Chiesa ball pass fing tak atangin Dusan Vlahovic chuan Juventus tan goal a khung a. Mahse hma erawh an hruai rei lo.
Minute ruk a liam hnuah Inter Milan in an si phurh an sut. Marcus Thuram ball cross chu fing taka Juve tlarhnung inkara tlanlut Lautaro Martinez chuan la in chep tawh tak karah a pet goal.
An result avangin Inter leh Juve hi pakhatna leh pahnihna an la ni a, an hnuai a awm AC Milan lakah point ruk leh point li in an la sang zawk.
Inter manager Simone Inzaghi chuan, “Juventus lakah goal khung hi a awlsam lova, hma an hruai tawh phei chuan a harsa lehzual. Kan inthlahdah miah lova, kan si phurh sutna turin goal tha tak kan khung a ni.” tiin inkhel zawhah a sawi.
Juve manager Massimiliano Allegri chuan, “Goal ho tak kan chhuah a, ven theih a ni. Inter hian hmunawl pek an nih chuan remchangah an la zel dawn a ni tih an lo lantir fo thin tawh.” tiin an inkhel a thlirlet ve bawk.