Tunlai hian mizoram chhim lamah Myanmar atanga raltlan an lo lut tam leh ta hle. Raltlana lo lutte hi zohnahthlak vek an ni tlangpui a. Chanchinthar lama an tarlan danin Myanmar sawrkar chuan an sipai hmun pawimawh Lailenpi an lo chan tawh chu laklet leh tumin thlawhna in a rawn bomb thin a. Mipui tan tlanchhiat loh theih loh khawpin a rawn nawr leh dawn niin an sawi. Raltlante hi mizoram chhim lama pawl hrang hrangte leh mipuiin an lo tuam hlawm mek a ni.
Myanmar ram indona hi kan hre vek a. Sawrkar sipai lam chu mipui sipaite hian hmun tam takah an nawr chep tawh a. A bik takin India ramri hnaiah phei chuan sawrkar sipaite hi a che tha lo zawkah an tang chho mek. Mahse, sawrkar pui ve, ralthuam chitin nena inthuam chu chuti maia tlawm chi a la ni hmel lova. Mipui sipai lam hi hmun thenkhat laiah han chak viau thin mahse, khawpui lian leh thuneihna chelhtu a la ni a. A sipaite a hnuhkhawm tak tak a, thlawhna nena a tan hi chuan mipui tan him a ram a la awm hlei thei lo a ni.
Engpawhnise, kan thenawm ram buaiah hian kan tan engnge tha ber ang tia ngaihtuahna kan lo hman ve erawh a tul a. Myanmar ram pumpui a buai mup mup lai hian engtinnge an buaina hi a kal zel ang? A tawpah tu dinhmun nge tha ang? Sipai lam hian chakna lo chang lo ta se an ram hi eng angin nge a awm zui dawn? Chumi hunah chuan keini hian hlawk nan nge kan hman ang buaina maiah tih hi lo thlir lawk a ngai a. Keini zofate hi chuan Myanmarah hian mipui sawrkar ding sela, India sawrkar nen hian inlaichinna tha tak neiin awm ila tih hi kan duhthusam a niin a lang.
Myanmar ah hian sipai sawrkar hi a chak loh chuan an ram pumpui hi hmun hrang hranga hnam hrang hrangte hi an inthen darh nuai thei a. An ram history enin ram pakhata awmkhawm hi an tlin lo ni berin a lang a. Sakhaw hrang hrang, tawng leh hnam nihna a thuhmun lo, mahni a ro inrel hran duh hlir awmkhawm an nih avanga tih pumkhat nana sipai tha chakna lo hmang thin an ni. Tuna an innawr danah hian sipai sawrkar hi lo tlawm ta se a laili laia Kawlho bak hi chu mahni a ro inrel tum hlir mai niin an lang a. Sipai sawrkar doah an in lungrual a, mahse ramkhat ni chhunzawm tlang zel tur chuan an inlungrual a rinawm loh a. Myanmar chu lo kehdarh ta se independent sawrkar hrang hrangah an awm fur hmel a ni. Union of Myanmar ah hian an chengho zelin a rinawm loh a. Mahni a ro inrel tumna a khat vek chu awmkhawm theih ani lo ang.
Myanmar chu lo kehdarh ta in India ram lam depa awmte chu mahni a ro inrel a an awm hunah India chuan helai ram mipuite nen thinlung inhmu taka kan awm ho theih hi India ram himna atan a pawimawh hle ang. Myanmar a kehdarh a, kan thenawma independent ram lo piang hlim nena inlungrual loh viau hi India tan a tha lo hle. Heng kan sawite hi thil thleng thei lo ani hauh lova. Chu hun a lo thlen hma a India hian ke a pen dik nan Myanmar ram buai hi uluk taka a en a, kan ramri hnaia mipuite nen inlaichinna tha tak lo siam lawk hi a fin thlak hlein a rinawm a ni. Ramri hnaia chengte nena thlahkhat zofate rilru sukthlek pawh India sawrkar hian en tel se a tha lehzual ngei bawk ang.