Aizawl: Mizo Zirlai Pawl (MZP) President H Lalthianghlima chuan nimin khan Union Minister of State for Minority Affairs John Barla chu Delhi-a a chenna inah hmuin Mizo zirlaite tana thil pawimawh hrang hrang a sawipui.
MZP President hi Rajya Sabha MP K. Vanlalvena’n a kalpui.
MZP president hian MoS Minority Affairs hnenah Mizo zirlai tam tak khawsak harsatna avanga zirna sang zawk chhunzawm thei lo an tam thu sawiin, zirlaite hostel tam zawk Mizoram-ah mamawh a nih thu a thlen a ni.
H Lalthianghlima chuan PMJVK Scheme kaltlanga nasa zawka zirlaite harsatna sukiang tura pui tura ngen bawkin, hemi kawngah hian MZP pawhin theihtawp chhuah a zirlaite tan hma an lak thin thu leh theihtawp chhuahpui chhunzawm zel turin a ngen bawk.
MZP president chuan, Mizo zirlaite thiamna leh theihna haichhuah a nih zel theihna tur leh zirnaa hma an sawn theih nan an harsatnate sukiang tura hmala turin union minister hi a ngen bawk.
Rajya Sabha MP K Vanlalvena pawhin zirlaiten hostel an mamawh nasat thu leh MZP hian zirlaite harsatna hrang hrang a buaipui thin thu a thlen nghal bawk.
MZP president hi NGO Co-ordination Committee hminga Mizoram inthlanpui vote chhiar hun sawn tura Election Commission of India dawr tura November 23, 2023-a Delhi kal zingah telin, tunah hian Delhi-ah an cham mek.