Khawvel thiamna changkang takin a hrinchhuah AI (Artificial Intelligence) kaltanga a pawi zawnga kalpui chhoh ni mek ‘Deepfake’ video chuan milian leh te chenin a hrut ta a, a bik takin milar te’n an tuar chho map map mai.
Tunhnai mai khan Indian actress lar Rashmika Mandanna chu deepfake video hmanga tihmualpho leh sawisak a ni a, midang taksaah a lû/hmai vuahsakin, mawi lo takin an chettir vel a ni.
Rashmika dawtah Katrina Kaif leh Kajol te pawh an zuah hauh lova, tuna a thar berah chuan Bollywood star Alia Bhatt chu deepfake video hmanga beih leh niin, chanchin buatsaih lai hian Alia-i’n official taka chhanletna erawh ala nei lo.
Deepfake video nghawng na tak tuartu leh dinhmun hrehawm taka awm mek Rashmika tan enliam theih a ni lova, thinrimna leh hnual rawih rawihna thlentu hi nakin zelah midangte paw’n an la buaipui chhoh tur leh harsatna namen lo thlentu a la ni zel dawn tih a sawi.
He video-a taksa pum lang zawka hi British-Indian influencer a ni a, a hmel leh hmai erawh Rashmika chiah niin, social media lamah a darh huk mai a ni.
X (twitter) kaltlangin Rashmika chuan, “He thil sawichhuah hi rilrunatthlak tak a ni a, online kaltanga darh mek deepfake video chungchang hi sawi ngei a ngai bawk si a ni.
“Dik taka sawi dawn chuan he thil hi ka tan chuan hlauhawm tak a ni a, keimah mai ni lova, vawiinah hian tute pawh he thil lakah hian kan fihlim thei reng reng lo hi pawi ta em em chu a ni a, technology hi dik lo taka hman a nih vanga mitinte kan derthawn nasatzia leh pawi pang a thlen theihzia hi chiang taka kan hriat a tul hle a ni,” a ti.