Times of India chanchinbuin ‘cop takes baby to work, social media cheers’ tih thupui hmanga Uttar Pradesh police constable pakhat, a fa nena pisa kai thlalak an chhuah chuan he police tan hian rah tha tak a chhuah a, a thawhna hmuh chu sawnsak nghal niin a chhungte nena an khawsakna hmunah a thawk tawh dawn.
Uttar Pradesh Director General of Police chuan constable Archana sawnna tur thupek hi a siam nghal a, tunah chuan an chenna pangngai, Agra-ah a awm tawh dawn a. Hetah hi chuan hnathawhna hmunah a naute hruai kher ngai lovin, awlsam zawkin hna a thawk thei tawh dawn a ni.
Constable Archana Singh hi Jhansi Kotwali police station-ah a thawk thin a. Reception counter-ah thuin a hmaa dawhkanah a fanu, thla 6 chauhva upa chu muttirin amah hian hna a thawk reng thung a. He thlalak hi ToI chanchinbu chuan a chhuah a ni.
Sawn a nih hnuah Archana chuan, “Agra-ah sawn ka ni dawn a, ka chhungte nen, ka fanute pahnih pawh ka hna thawk reng chungin awmhmunah ka enkawl ve thei tawh dawn a ni,” tiin a sawi.
Nimin khan DGP OP Singh chuan Archana hi an chenna, Agra district-a sawn a nih thu leh a chungchang ToI-a an chhuahna thlalak hi Twitter-ah a post nghe nghe a ni.