China rama pneumonia hri leng mek chungchang leh he hrileng laka Mizoram a him theihna tura hmalak tulte nimin khan Health department hotute’n an sawi ho.
SAD Conference Hall, MINECO-ah sawihonaah hian Health Department Principal Secretary Esther Lalruatkimi chuan, China rama pneumonia hri leng vanga nausen thi an awm thu a sawi a. Sorkar laipuia Ministry of Health & Family Welfare lamin a tul anga lo inpuahchah tura hriattirna an tihchhuah avangin Mizoram pawh an lo inbuatsaih a ngaih thu a sawi.
Esther Lalruatkimi chuan sorkar laipui Ministry atanga lehkha rawn kalah, tun dinhmunah chi-ai na tur a awm loh thu an ziak tih sawiin, mipuite chu chi-ai lo turin a chahin, “Hmalam hun hriat lawk a nih loh avangin kan phak tawk china lo inbuatsaih hi a pawimawh a ni,” a ti.
Covid-19 hripui len laia inkaihhruaina dan te kha fimkhur thilah zawm tur chin te ngaihtuah a, health sector a thawktute dinhmun leh damdawi, hmanraw neih te lo in hrechiang tura hriattirna dawn a nih thu a sawi bawk.
Health Department hotute chuan China rama pneumonia hri leng chu zirchian mek a nih thu sawiin, tun dinhmunah India ram tan hlauhthawn tur a awm leh rih lo ni a a lan thu an sawi a, chutih rualin inthlahdah chuang si lova India ram chhung a bikin Mizoram hnaih state hrang hrangte dinhmun thlithlai reng a tul thu an sawi.
Thutkhawmah hian Health Department hnuai thawktu hrang hrangte dinhmun bakah damdawi in hrang hrang, hmanraw neih te leh damdawi kawl mek te dinhmun sawiho a ni a, a tul anga inthuam chak dan tur te an rel bawk.
He hunah hian Health Department Principal Secretary bakah, Special Secretary Vinay Kumar, Principal Director Dr Vanlalsawma bakah Health & Family Welfare Department hotu lian te an tel a ni.