Meghalaya-a hriselna lama thuneitute chuan swine flu avangin nimin khan ralkher dar an khawng ri a, H1N1 virus kai an hriat chian mi pahnih zinga pakhat chu Pathianni khan mi mal damdawi inah a thi tih nimin khan minister-in a puang a ni.
Ani hi kumina swine flu avanga he state-a nunna chan hmasa ber a ni a. Kum 2009 hnua Meghalaya-a he natna avanga thi hmasa ber niin health official-te chuan an sawi bawk.
Nimina thi hi nu kum 57 mi, Nazareth Hospital-a October 19-a khawsik, khuh, taksa chak lo leh thawkna lam buai avanga dah luh a ni a, Critical Care Unit-a dah luh a nih hnuah Pathianni tlai lam khan a thi tih damdawi in hotu, Dr Himjyoti Das chuan a sawi.
He hmeichhia hi tun hnaiah Pune-ah chhungkaw thil pawimawh tiin a zin a, a lo haw hnuah a awm a nawm theih loh avangin en dik a ni a, H1N1 virus a kai ngei tih Dr Das hian a sawi.
He thil thlen hnuah hian Health Minister A.L.Hek chuan state pumah inralrinna dar tihrik nghal a nih thu a sawi a, “Invenna lam pawh kalpui nghal a ni a, damlo an awm palh pawhin rang taka enkawl nghal theih turin inbuatsaih a ni,” a ti.
Guwahati International Airport leh Shillong airport-a Airport Authority of India thuneitute hnenah pawh a theih anga hma lakpui tura an ngen thu minister hian a sawi bawk.
Hmeichhe dang, swine flu vanga October 24 atanga enkawl erawh a dinhmun a tha niin a sawi.