Inter Milan in second half-ah an si phurh an sut zo a, goal thum an chhuah hnuah point hmu turin 3-3 in Benfica lakah an tho leh.
Nilaini zana Estádio da Luz a UEFA Champions League Group D inkhelah tling chiang tawh Inter in an first team player rinrawlte chawlh hahdamna hun an pe a, team an inthlak kual avangin an inkhelah pawh a lang.
Benfica tan midfielder tawnhriat ngah Joao Mario chuan a club hlui lakah first half-ah hattrick a siam a. Minute 5-na, 13-na leh 34-naah te goal a khung.
Simone Inzaghi pawlten first half-ah goal hlauhawm siam an harsat a, chance an neih chhun an hlah leh thin bawk.
Second half-ah striker Marko Arnautovic chuan an goal hmasa ber minute 51-naha a khung a. Minute sarih hnuah Davide Frattesi chuan an goal hnihna a khung belh ve leh a ni.
Minute 72-naah Nicolas Otamendi chuan Marcus Thuram ti tlu in penalty a chawi a. Alexis Sanchez-a’n goal-ah khungin Inter in an si phurh an sut zo.
Group inkhel hnuhnung berah Inter hian Real Sociedad an hmachhawn dawn a, group hmahruaitu nih an inchuh ang.
Inzaghi chuan, “Second half a kan thawhleh dan khan min ti lawm hle. A chak zawk kan ni teuh.”
“First half kan khelhdan a tha lova, kan khingpuite theihna kan hriat chian avangin second half-ah khan kan insiamthat ngei ngei a ngai tih kan hria.” tiin inkhel zawhah a sawi.
Inkhel dangah Real Sociedad in goal hma a an hriam loh an tuar a, Anoeta Stadium a inkhelah FC Salzburg nen goal inpe lovin an inhnehtawk.