Jammu & Kashmir-a police leh hel pawl inkahna nasa tak thlengah nimin khan Jaish-e-Mohammed firfiak pawla mi 3 kah hlum an ni.
Inkahna hi Jammu-Srinagar national highway-a toll plaza-ah hian a ni a. Director-General of Police Dilbag Singh chuan an mi kah hlumte kut atang hian ralthuam chi hrang paruk, sniper rifle leh puak thei dang lian zawkte pawh hmuh a nih thu a sawi.
DGP Singh chuan firfiak mi 3/4 chu toll plaza-ah hian an lut tih hriat a ni a, hei hi Jammu atanga km 28 vela mi a ni a, truck hmangin Kashmir Valley luh an tum niin a sawi.
Police-te hian heng firfiak an kah hlum takte hi Kathua district-a a ruka ramri kânin India an lo lut a, na taka chet an tum nia an hriat thu an sawi.
DGP chuan an inkahnaah hian police hliam tuar pawh a awm ve tih a sawi a. Firfiakte chuanna truck khalhtu leh a conductor an man nghal tih a sawi bawk.
IGP Jammu Zone Mukesh Singh chuan truck hi nimin tuk khan Bann toll plaza-ah police leh CRPF ten an nangching a, heta tang hian an inkap tih a sawi.