- Dr. J.T. Vanlalngheta
Tun hnaia Mizoram chhunga Hotel neitute leh Mizo nu pakhat inhmachhawn chungchang social media-a lo lang ka hriat rualin ka rilruah thil pakhat a lo lang nghal a, (he thil hi sawi zui lovin thil dang sawi daih ka tum a ni, chu chu– Pi Rajyalakhsmi Rao, Member, National Consumer Disputes Redressal Commission lehkhabu ziah ‘Consumer is king’ tih ka chhiara a lairil kha a ni.
Hotel leh Restarant siamtute mai ni lovin, mi zawng zawng hi thil leitu leh hmangtu (consumers) kan ni vek a, hotel neitute leh dawrkar-te pawh an service emaw thil zawrh emaw ni lo, dawr/service dang an va dawr/chakkhai an va lam khan consumer an ni nghal vek mai; sum leh pai hlawh chhuah nana mi dangte rawng bawlna chi ‘services’reng rengah hian Zofate hi kan inenfiah fo a ngai hle; thil leitu leh hmangtu, sum senga thil ei/ei reng reng (customers) hi, a leitirtu/ei tur hluitute tan hian ‘Lal’ an ni vek tih chu he lehkhabu thu chah laimu a ni. Consumer protection act, 1986 (Its Rules 1987& Reg.2005)-in a hrilh tum pawh sumdawng va dawrtute, ‘lal’ an nihna hi a ni. Sum sen leh kan thil va lei emaw rawng min bawlsaktute service quality kha a inchawih mawi tawk/inhen tawk tur a ni, tihna a ni; hei hian thil zuar leh hralhtu/mi dang rawng bawlsaktute lam atanga hawihhawmna nena kan rawng bawlsakate tana theih tawp chhuah pawimawhzia a keng tel vek a ni. Hotel leh restaurant neitute thil ei/in chhawpte chu a dawrtute duh thu sam chu a ni vek thei lo vang tih chu hriat sa a ni a, thui tak inhriatthiam pawh a ngaih hun a awm thei ang; mahse, hawihhawmna chungchangah te, ei tur chhawp thianghlim chungchangahte, a thar (fresh) chhawp chungchangah te theih tawp chhuah a ngai a ni. Sumdawn, entir nan–hotel leh restaurant enkawl te hi thil namen a nih loh avangin Mizoram chhunga hotel/restaurant enkawltu member zingah hian Hotel/restaurant tinah kum 2/1 training chu sawi loh short term training, eg thla 3–6 tal zo tawh leh internship pawh ti tawh te hi tel ve ngei thei vek sela tih chu, tun internet khawvelah hi chuan duh thu sam chu a ni tawh a ni. Training hun chhung rei deuh zawk duh Hotel Management course degree leh diploma, adt hi chu sawi thu a cheng lo va; A mi nawlpuiin awlsam taka an zawh mai theih short term course–hotel hospitality hi thalaite hian tun ai hian bawh deuh sela a tha khawp mai; , kan Mizo zia nen pawh a inmil khawp mai. India ramah pawh hotel hospitalities training-na hi hmun hrang hrangah a awm a, Mizoram atanga phai rama inhlawh zingah pawh hian (ka tawn hriat atangin) a hlawhtling ber chu hotel hospitality-a short/long term training neih hnua kan thawn thlak/chhuk thlakte hi an ni hial ang. Vai ramah chuan dawrkai/hotel neitu leh nghaktute hian anmahni dawrtute hi,’ Lal ka ni’ ti vek hmuha an hmuh avangin an tan theih tawp an chhuah a, thenkhat chuan complaint box te an hung a, chu chuan mikhualte tan lung awina a siam a, chu chuan an mahni dawrtute a hip zui a, dawrtu an ngah zel a, an lo hlawk a, an lo hausakpui ta thin niin a lang.
Kei pawh Aizawl atanga khawchhak lama kan zin tumin, chaw leh chawhmeh min chhawp chungchangah consumer ka nih angin, inthlahrung takin thil pakhat sawi ka nei ve a, chu chu lawm taka dawngsawng ta lo chuan, ” Ei lo tawp la a ni mai alawm,” mi ti a, hmanhmawh deuh lo phei ila chuan, hotel-a chawl zelte tana mal sawmna ni turin kan inhnial zui deuh maithei.
Hotel-ah hian khualzin mi chi tinin an ei/in a, hei vang hian chaw/chawhmeh thar leh lum tha inhlui zat zat theih hi chu duh thu sam a ni; sa chauh lo pawh, chaw eitute lamin an sawisel lem loh pawhin, chawhmeh thing leh dai te hi inchhawp loh hram ni se, kawchhung hian hetiang hi a kawmngeih lua lem lo tih te hi hriat nawn thar fo a tha ang.
A tawp nana ka sawi duh chu, Sawrkar laipui atanga sum leh pai nena tang duna Hotel hospitality training-na hi Mizoramah hian a tam tawh hle a, hotute zara kan training chhuahtir Mizo nula/tlangval hi an thahnem hle tawh a ni. Heng traing institution atanga zir chhuak, phai rama tawn hriat nei tawh, Covid leh chhan hrang hrang vanga lo hawte leh hna mumal la thawk hman lote hi Mizorama highway restautrant/hotel-ah te hian thawk awm vek tawh se, hotel leh restaurant neitute leh khual zinte tana hma sawnna nasa tak a ni ngei ang. Training leh a hnua tawn hriat neih hnua ei zawnna (trade & job roles) hrang hrang hmanga mipui rawng bawltute quality leh training nei lova inzir chawp chunga thawka mipui rawngtute thiamna/thawh dan (quality) hi a inthlau viau thei a ni. Hmatiang sawnin Zofate i kal zel ang u.