- Dr. C. Lalrampana
A KAMKEUNA
Tun tum 9th Mizoram State Assembly inthlanpui zet zawng Political Party tinte tan lãk a na bawk a niang, MPF leh Kohhran hruaitu puithiam rualte’n “political platform atang leh social media hmangin insawisel tawn loh ni se” tia theihtawpa ngenna an thlen chungin a sãwt meuh lova; tawngkam mawi lo tak tak leh tawngkam feikibãrin an inkhawhtawn zuai zuai ni berin a lang. Hetih rual hian Political party tinte’n sorkarna siam ngei turin an insawi theuh a, a bikin rorel lai MNF Party leh ZPM party-te’n Sorkarna an siam ngei an inring nghet hle niin an interview-na hrang hrang atangin a hriat theih. Hun kal tawha sorkar inthlak thleng dan chhut letin a lan dan ringawt atang chuan rorel lai party MNF bawk hian sorkarna changleh ngei tura ngaih theih a ni. Mahse, vanduaithlak taka an sorkar leh lo hlauh a nih chuan tu sawi buai theih a ni lova anmahni mawh ngei a ni ang.
ROREL LAI HI TLA TA SE?
Mizoram bikah chuan sorkarna changtu rorel lai party te hian an che tha lo hle a nih loh chuan term hnih tal hi chu a zawnin an sorkar deuh tlangpui thin. Amaherawhchu, tun tum inthlanpui erawh hi chu a danglam viau mai thei. A chhan chu abikin ministry lo chelh tawh political party kum 60 zet tling tawh MNF Party leh INC-te hian an thutiam hlen tak tak si lova mipui an bum zing tawh nia a lan avangin sorkarna la chelh ngai lo, hmel thar diai a lo lang nawlh thei a, chutih rualin rorel lai mek MNF party bawk pawh hi a sorkar veleh thut thei bawk. Mahse, a sorkar zo ta lo a nih erawh chuan a hnuaia tarlante vang hi a nih theih ngei a rinawm. Chungte chu:
LEIBA NGAH VANG
MNF sorkar hi Fiscal management-ah a hlawhchham hulhual nia a lan avangin GSDP atanga tehin India ram state & UT zinga leibã ngah ber niin 53.1% leibã a nei a, hei vang hian Zoram mipuiin sorkartir leh chiah an ngai tawh lo a niang.
INRINHLELHNA VANG
Covid-19 hripui len vanga Central Sorkar lamin sum tam tak kawng hrang hranga a rawn pek leh CM Relief Fund-a sum tam tak lo lut hmanralna chiang taka hriat hleih theih a nih loh rualin Health Department bik chauhin khatih lai khan fet taka audit a hmachhawn a, khata tang khan MNF Sorkarah inrintawklohna lian tak a rukin a awm tih mi tam takin an thlir dan a nih avangin mipui rin an hlawh zawh loh phah a ni thei a, an party chhungkua pawh a rukin nasa takin a nghawng thei niin a lang.
PHUL LEM PHAH VANG
MNF minister theuh theuh zingah an pu berah an intlaktlum hleih hlawm hle nia sawi a awm a, Minister pakhatin a department chan develop nan phullem engemawzat a phahtir theih laiin minister tam zawkte kut bengin an dawha reng thin niin a lang a, kha khan party mipui rilruah a tha lo zawngin nghawng a nei thui hle niin a lang a, an vote a kal darh nasat phah a ni thei.
CONTRACTOR BILL TANG
Sorkar lai Party mi leh sa contractor theuh theuh zingah Kamrula, Zoramchhana te bill leh supplier thenkhatte bill vbc engemaw zat pawh ni se, treasury hrang hrangah a tang ve ngai lo nia sawi a awm laiin contractor dangte bill erawh lipuia hreifang tla ang vang vangin tun thlenga pil bote a la awm hnem hle nia sawi a awm a, hei vang hian mahni party a ruka phatsan an tam a ni mai thei.
RETIREMENT BENEFIT
Sorkar hnathawk chãwl tawhte retirement benefit vbc 180 chuang fe pe thei lova tun thlenga a awm nia a lan avangin an chhungte leh vua leh vang tam takin sorkar tharah beiseina an neih avangin a rukin fing takin sorkar lai party paih thlak dan an zawng a ni thei.
ZIRTIRTU LEM
Khawvel ramdanga awm ngai lo, Zirtirtu phuahchawp MR Teachers leh SEDP Teachers sang chuang zetin hlawh lak mumal lai reng an nei ngai lo nia a lan avang leh an dinhmun a derthawng hle tih an hriat avangin an party phatsanin an chhungkua vua leh vangte nen tang rualin an pute an phatsan vang a ni thei ngei ang.
MR BILL & HEALTHCARE BILL
Mirethei damdawi in awmna healthcare bill ba tam tak leh sorkar hnathawk MR Bill & GPF (NRW) engemawzat Treasury-a a tan khawm laiin mi tlemte thenkhatte’n awlsam takin an la thei niin sawi a awm a, hei vang hian sorkar lai party vote zel chiah an ngai tawh lo a ni ngei ang.
ZÃWL BIK NEI LO VOTERS
Political party vawn bik nei lo nutral voters tam tak sorkar lai party-in an hui thin ang kha tun tum inthlanpuiah hi chuan ruling party hian a hui tlem hle niin a hriat theih. Vote thlak nia han vahkualna velah pawh nutral tam berte hian tuntum chu “a thar enchhin ve ila a tha ang a?” an ti deuh thup niin a hriat theih. Chuvangin, ruling party hian nutral vote an hmu tlem viau a nih chuan tlãkna tham a ni ngei ang.
A TLÃNGKAWMNA
Khing tarlan takte ringawt pawh khi sorkar lai party tan chuan tlãk chhiatna tham niin a lang a, chuachhapah an Headquarters Hnam Run nghaktu party workers, block level leh Unit level-ahte inthliarna a nasa hle niin sawi a awm a, CM dinna bial Aizawl north-I constituency-a sum lut tam bik lutuk avanga party workar,-te dang ro, dang chãra an dãwng reng bik nia sawite a awm a. Minister pakhat hna chanpual phei chu Hnam Runa Women Front hruaitu pakhat kaltlang lo chuan cement bag khat lek pawh a lei theih loh nia sawi te avawm a, Johnson Park pawh midang ta anga lang, mahse, pu ber fapa ta ngei ni reng sia sawi awm te, pu ber dawttu leh Champhai North-I lama party dang candidate ni ta daih nena an hna insem ruk awm thin nia rinhlelhna awm anga sawi te, an pute enkawl dana lungawilohna party workers leh campaigner-te zingah an awm nia sawi te, an party spokeman ngei pawh restricted tender tam lutuk avanga hna a hmuh theih loh avanga a ruka a lungawi loh thu sawi rik awm te, kum tam tak Ram tana hrehawm taka jail tang tawh beiseina leh hamthat vena tur hnawlsak thina a awm fo nia sawite leh contractor hna inhmuh theih hleih dan te, party workers kutbenga an awm rei tawh dan leh HQ-a Party secretary liante pawh beaurocrat-hovin engahmah an ngaih lohzia atanga an pu ministers-te nen percentage awma contract hna an thawk tlang nia rinhlelh rukna awm thei avang te, an pu berin financial dictator power hmanga treasury a thunun tlat nia ngaihna awm mek te, an pu berin a tlem berah cheng vbc 40 chuang fe sulrul leh tuiêkin a ei chhiat theihna hmun Financial institution hrang hrangah a chhungkhat vua leh vangte hminga ro a khãwl khãwm an rin rukna awm mek niawma sawite avangin tuna ruling party MNF “Pathian leh kan ram tan” tia Pathian telna tlãk ni lem si lova ngaih theih sorkar lai mek hi tun tumah hian an sorkar leh lo a nih ngat chuan a chhungah a ruka eichhetu thingngêt leh rulhlut leh vual tam takin a ei chhia a ni ngei ang tih a hriat thiam theih mai awm e. I lo thlir phawt mai teh ang u.