Islamist firfiak pawlten Pathianni chawhnu atanga Somalia khawpui, Mogadishu-a khualbuk an luhchilha venhim hna thawktute nena inkahna chu a tawp ta a. He inbeihnaah hian a beitute nen mi pakua an thi.
Afrik Hotel beihna hi Pathianni chawhnu atanga intan kha niin mi firfiakten a luhkapui berah car bomb an tipuak a, a chhungah an lut zui a ni.
al-Shabab firfiak pawl chuan an tihah an chhal a. An pawl hi al-Qaeda nena inzawm niin Somalia-ah hian sorkar beih nan tharum thawhna lian tak tak an lo thlen tawh thin.
Mi panga thi an awm a, a beitu mi pali vel an thi bawk niin AFP news agency chuan a sawi a. Firfiak pathum kah hlum an ni a, pakhat erawh a bomb pai tipuakin a thi niin tar lan a ni.
Puak thei thahnem tak phur car hian khualbik luhkapui suin a bomb pai a tipuak nghal a, a chhungah mi dang an tlan lut zui bawk niin thuneitute leh thil thlen lai lo hmutute chuan an sawi.
“Bomb puak hian khualbuk hi a sawi nghing nasa hle a, a chhungah thua kan titi lai a ni a. Kan chiai a, awm dan tur pawh kan hre lo,” tiin a chhunga lo awm pakhat, Ahmed Nur chuan Reuters hnenah a sawi.
“Tunah chuan kan beihpui thlak a zo ta a. A vaiin mi pakua thi an awm a, pali hi a beitute niin civil mi 10 chuangin hliam an tuar a. Electric a awm lo,” tiin police thupuangtu chuan a bula thuthar thehdarhtute hnenah leh Facebook-ah a tar lang.
Prime Minister Mohamed Hussein Roble chuan thi zingah hian sipai general hlui, Mohamed Nur Galal pawh a tel niin thuchhuah a siamah a tar lang.
A bul lawkah hian an khawpuia thlawhna tumhmun lian ber a awm a, hei hi khauh taka ven a nih avangin firfiakte hian Afrik Hotel hi an bei ta zawk mai nia ngaih a nih thu BBC chuan a tar lang.
Khualbuk beih tak hi Somali sorkara mi pawimawhten intawh khawmna atana an hman nasat tak a ni a. Beih a nih lai pawh hian an ram rorel khawl member leh sipai hotu lawk eng emaw zat an awm niin police captain pakhat chuan a sawi.
Social media-a video thehdarhah chuan khawpui chhung atang hian meikhu chhah tak pawh a dum chho nasa hle.
Tun tuma beihna thleng hi Mogadishu-a beihna thleng lian tak a ni a. al-Shabab hian nikum khan tuipui kama Elite Hotel pawh beiin darkar sarih zet an luhkhung chhungin police leh venhim hna thawktu dangte nen an inbei nasa hle a, mi 17 an thi.