Tripura-a Kanchanpur bialtu MLA, IPFT atanga thlan tlin, Prem Kumar Reang chuan a hnampu, Bru raltlante sorkarin a ngaihsan lohva an buaina a ching fel thuai a nih loh chuan MLA atang a bâng dawn tih a sawi.
Reang hi Bru refugee camp zawng zawng awmna, Kanchanpur bial atanga thlan tlin a ni a. Sorkar laipui chuan an ni ti mamawh a pek thin chu tun hnai khan a titawp a, kum 1997 atanga he camp-a lo awm tawh Bru-te hi an mangang mek.
Sorkar nawr nan hian Bru-te hian October 31 atang khan Anandabazar-Dashda road an lo dang tawh a. IPFT MLA chuan, “Reang hnam ka ni a, ka chipuite hi riltamin an thi mai dawn a, ka au chhuah a ngai,” a ti a. Reang-te hi Mizoram-a kir tur an ni a, an kir hmain an puar phawt a ngai tih a sawi bawk.
Kanchanpur subdivision-ah hian boruak awm dan a that loh avangin sorkar chuan hmun eng emaw zatah curfew a puang tawh a. Tuna Mizorama lak kir tumnaah hian kum 1997 atanga he camp-a lo awm tawh Bru chhungkaw 4,447 lak kir tum an ni.
Sorkar laipui chuan a thawh 9-na atana lak kir turah hian Rs Vbc 350 a ruahman a, hengte hi an kalna man leh an awmna tur an thlen hunah an inbenbelna tur bakah kum hnih chhung thla tin Rs 5,000 leh a thlawna ration a pek tur atan a ni.
Bru buaina hi an tana Mizoram khawthlang lam, Bangladesh leh Tripura huam tela autonomous district council hran an ngiat atanga intan a ni.