Kumin kumtir lamah khan BJP hian chhim lam state lian, Karnataka-ah Congress an hneh lo va, an tan hei hi a na viau a. Hemi tum hian Gandhi-a a thawk rim a, kum 2019 inthlanpuia an chak loh chian em avanga thawh leh tumia beiin ni 135 zet chhung kein km 4,000 chuang kawng a zawh rah pakhata ngaih a ni.
Karnataka-a hnehna an chan hnu leh mi tihhmingchhiat thubuaia parliament member atanga hlih a niha lak luh leh a nih hnuah hian Gandhi-a hi eptu party 28 zette tanhona, Indian National Developmental Inclusive Alliance (INDIA) dinna turah pawh a thawh hlawk hle bawk.
Tun tuma state pali inthlanah hian state tina inelna an neih avangin an tanhona hi an kalpui lo va, BJP leh Congress inkhinna tho a ni.
“Congress hian Telangana-ah an titha hle a. State pathuma chak loh erawh a pawi a; mahse, eptu chak tak kan ni thei dawn tho a ni,” tiin Congress thupuangtu, Supriya Shrinate chuan Reuters hnenah a sawi.
Pathiannia vote chhiar tak state palite hi vote nei mi maktaduai 160 chuang awmna niin parliament-a thutna 543 awmah thutna 82 changtu an ni.
Modi-a leh Congress hruaitute chu Gandhi-a hovin campaign laiin an bei nasa a. Pawisa inpek te, lo neitute loan lak ngaihdam te, thil man tlawm zawka inleitirna tur te, insurance te leh thil dang dang zuarin voter-te hmin an tum hlawm.
Politician leh mi thiamte chuan state inthlante hian ram pum inthlanpui tur a hril lo va, ram puma voter-te rilru put hmang a tilang chuang lo niin an sawi.
Tun hma pawhin inthlanpui hma lawka state inthlan result hian ram pum inthlan a nghawng lo tih a lo lang fo tawh thin.