BJP chuan Pathiannia state palia assembly inthlan vote tlate chhiarah pathumah sorkarna an siam dawn ngei niin a lang a, ram inthlanpui atan thla ruk chauh a awm tawh a, Prime Minister Narendra Modi-a tan a term thumna tura sorkar siam leh turin kawng a inhawng nia ngaih a ni.
Hindi heartland state tia an sawi zingah Rajasthan, Madhya Pradesh leh Chhattisgarh leh chhim lama Telangana-ah thla hmasa khan mipuiten vote an thlak a. May thla maiah Lok Sabha inthlan a awm tawh dawn avangin heng inthlan hi Modi-a sorkar tan ‘semifinal’-a ngaih a ni.
Pathianni tlai thleng khan BJP hian heartland state pathumah hma hruaiin sorkarna an chang ngei dawnin a lang.
Opinion leh exit poll hrang hranga rin dan aiin BJP hi an che tha a, Modi-a party hi eptu lian ber, Congress nen inbei tawk viau tura ngaihnaah anla chak viau a. BJP leh Modi hi kum 10 dawn ro an rel tak avangin mipuiah ninna a awm tan nia ngaih chu a ni chiah lo nia ngaih a ni.
Congress chuan Telangana-ah hnehna an chang dawn niin a lang ve thung a, kumina chhim lama an chak state pahnihna a ni a. State khat chang mah se Congress leh an hruaitu, Rahul Gandhi tan chuan heartland-a chet that loh hi thil pawi a ni.
“Heartland state-ah hi chuan kan chak dawn tih kan sawi fo tawh thin a ni,” tiin BJP President Jagat Prakash Nadda chuan Reuters hnenah a sawi a. “He result hi political strategy tha leh a bulthum atanga kan thawhna rah a ni,” tiin a sawi bawk.
BJP member leh thlawptute chuan state pathumah hian khawlaiah chak lawm nan halpuah leh halmawi an hal a, lamin khuang an vaw nasa hle bawk.
Union Aviation Minister Jyotiraditya Scindia chuan, “BJP tan chuan state pathumah chiang taka hnehna a ni a, mipuiin Modi-a an rintawkzia a lang a ni,” a ti a. Ani hi Madhya Pradesh mi a ni.
Modi-a hi India-ah a hming a la lian hle a, zirchiannaah pawh nakum inthlanpuiah hian a la chak ngei dawn niin an sawi hlawm a. Hetih lai hian party 28 zet intelkhawmna, Congress kaihhruaiin BJP hi an beihrawn dawn a, chona lian tak a ni thei dawn.