Mak i ti ngawih ngawih a, engtiklai atang khan nge pawh i hre thei chiah tawh lo. I pasal leh kawppui chu itawm loh leh hipna pawh ngah tawh loa hriatna i nei ta tlat mai. I han ngaihtuah vang vang a, tunah khan i pasal kha tisa zâwng tak pawha itna leh thlakhlelhna i nei tlem tial tial mai.
Heng a hnuaia tarlante hi i kawppui i chiau-au peih loh tial tialna leh i thlakhlelh tawh lohna chhan langsar zual te an ni:
A tlangpuiin, mipate hian an nupuite’n fa an han neih hnu-a an taksa leh rilru-a danglamna lo thleng chu pawm thiam harsa an ti ve hle thin a. Chu chuan, nupanun hmannaah pawh harsatna tam tak a thlen thin. Chutih laiin, nulat lai anga inchei leh intihfai thin ang kha a ni tawh lova, nu nih tawh vang maia tawp tak leh hnawk ang reng taka awm hian pasal te a tibeidawng thin a, rinawm lohna leh uirena hial a chawkchhuak thei.
Khawvel lo changkang zel hian hmeichhe piannalh leh duhawm ngainat leh hlutna hi a nawtreh thei chuang lo a. Mi zawng zawng tih mai tur hian piannalh hi kan duh vek. Amaherawh chu, fa 2-3 vel neih tawh hi chuan pian a fuh thei meuh tawh thin lo. Engpawhnise, thâu lutuk lo tura inven a, a tul dan a zira taksa insawizawina mumal tak
neih ngei i tum dawn nia.
Nupui/pasal neih hnu hian duh emaw duh loh emaw mi tute mai pawh hian danglamna (change) kan nei nghal zut zut thin a, landan emaw mizia ah te thlengin a ni ang. Rilru suthlek a lo danglam a, chu ringawt pawh chuan in inttawnna leh inthlakhlelh tawnna a umkiang thei.
Nupa nun hman duh lohna leh hnar tlatna hi a pawi. A chângin, hmeichhiate hian an lungawi lohna leh thinrimna lantirnan, lehlam hawi san daih a, mipate khawhar taka dah an ching thin a, sex hi thinrim tihlannana hmang tawk pawh tam tak an awm. “I lakah ka thinrim ngawih ngawih a, chuvang chuan zanin chu a hrangin kan mu ang” tih tlawng mai te hi a zia lo thui viau thei a, chu chuan inhiptawnna leh inthlakhlelh tawnna kan tih kha a hnawtbo chiang thei hle a ni.
Tin, sex hman danah duhzawng leh theih chen te pawh inang lo thei a ni a, inpawh taka sawi dun a tha hle.
Kârah fanau an lo awm tawh a, chu chuan tunhma zawng aiin mawhphurhna lian zawk a lo chhawm nghal a. Nupa tan pawh taksa, rilru, ngaihtuahna chen-in chauh ngawih ngawihna a thlen a, chu chuan engmah tih peih lohna leh innin tlatna a siam thei tho bawk
Engnge i tih tâk ang?
Nupa inkarah daidanna bang siam mai lovin, inpawh taka engkim sawi dun hram hram tum ang che. Sex chungchanga i duhdan leh ngaihdan te, i duhzawng leh duhloh zawng thlengin tlang takin inhrilh thin ang che u. Harsatna leh buaina a lo awmin, dawhthei takin sawipui la, tihnawk zual lo turin rilru thianghlim pu ngei bawk ang che Mimal ang ni lovin, a huho anga thawhdun tum a tha. I pasal kha sawipui la, thil dik lo leh fel lo chu siamfel dan ngaihtuah ang che u. In tihfel hma loh chuan remchanna tam zawk insiam sak pawh a pawimawh khawp mai.
Landan leh hawiher-a duhkhawp lohna a awm chuan tha te te-a inhrilh a, a rilru hneh ngei tum tur Zep thu a cheng lo, nupaa insiam tawh chuan ‘sex’ hi a banpui lian tak a tling pha a.
Taksa leh rilru phuarkhawm theitu a nih miau avangin
namnul chi a ni reng reng lo Buaina leh harsatna te hi khumlai zawlah te thleng thlenga hnuhluh loh tur. Nuam takin, thlamuang takin hmang thin ang che u. Chutih laiin, Sex hi hmanruaa hman reng reng loh tur a ni a, i thinrim anih pawhin sex hmanga intih-tauhkhum te hi a tha ber lo tih i hre dawn nia.