Election Commission of India (ECI) atanga thupek bawhzuiin Excise & Narcotics Department, Mizoram chuan Mizoram state assembly 2023 atana vote chhiar ni tura ruat December 4, 2023 (Thawhtanni) hian Rule 5 of the Mizoram Liquor (Prohibition) Rules, 2022 in thuneihna a pek tlawhchhanin Mizoram pumah zu khap burna Dry Day puan a nih thu a chhuah a, he thupek hi vote chhiar zawh thleng kenkawh a ni ang.
Dry Day puan a nih chhung hian sipai canteen atanga zu zawrh chhuah leh in khap tlat a ni a. He khapna thupek hi mipui nawlpuiah chuan dan dinglai hman mek a ni.
Khapna thupek hian November 3, 2023 a Excise & Narcotics Department kaltlanga thuchhuah lo siam tawh chu a rawn luahlan nghal a ni.