Manipur-a chi leh chi inkara buaina kal zelah Thawhtanni chawhnu khan Tengnoupal district-a tharum thawhna thleng thar lehah mi 13 vel an thi.
Venhim hna thawktu pawla hotute chuan chhun lai velah Tengnoupal district-a Saibol bul, Leithu khuaah hel pawl pahnih nasa takin an inkap tih an dawng tih an sawi.
“Venhim hna thawktu awmna hnai ber chu km 10 vela hlaah daih a ni a. Kan sipaite che chhuak nghalin a hmun an thlen chuan Leithu khuaah hian ruang 13 an hmu a. Heng ruangte bulhnaiah hian ralthuam engmah hmuh a awm lo,” tiin officer pakhat chuan a sawi.
Officer chuan thite hi Leithu khua leh a chhehvela mite an nih loh hmel niin a sawi a, hmun dang atanga lo kal niin pawl dang nen an inkahnaa thi ta nia an lan thu a sawi.
Police leh venhim hna thawktu dangte chuan tute nge an nih hlawm engmah an la sawi lo.
“Police an thleng tawh a, an chhui zui nghal mek a ni,” tiin a sawi.
Tar lan tawh thin angin Manipur-ah hian May 3 atang tawh khan Meitei leh Kuki hnam inkarah buaina a chhuak mek a. Buaina avang hian mi 182 vel thi awm tawhin chenna in nei lova baihvai mi 50,000 chuang an awm tawh bawk.
Hetih lai hian Pathianni khan thuneitute chuan ramri hnaih district-te tih lohvah chuan mobile internet service an tinung leh tan ta bawk a, thla sarih zet mobile hmanga internet hmang thei lovin an awm hman a ni.
Internet la tihnun lohna hmunte hi Meitei bil emaw, Kuki bil emaw tamna district zel niin thla sarih liam ta chhunga tharum thawhna, silaia inbeihna, in leh hmun inhalsakna leh inruk bona thlen tamna hmun a ni hlawm.
Internet tihnun leh a ni hma lawk, ni li liam taah khan sorkar laipui leh Manipur state sorkar chuan New Delhi-ah United National Liberation Force (UNLF) chu inremna a ziahpui a, anni hi he state-a hel pawl hlun ber an ni.