China chuan tun hmaa an lo sawi fo tawh angin Arunachal Pradesh state hmun thenkhat chu an ram, Tibet chhim lam rama bet tur niin a sawi nawn leh a. Tun hnaia he state atanga thalai panga bo, People’s Liberation Army-in an ru bo nia sawite pawh an chinchang an hriat loh thu an sawi zauh hnuah an ram lamah hmuh an nih thu a sawi leh.
Union Sports Minister Kiren Rijiju chuan Arunachal thalaite China-a hmuh an nih thu hi Twitter-ah nimin tlai khan a tar lang.
“China sipai, PLA chuan Indian Army-in hotline message an thawn chu chhangin thalai pangate an ram chhungah hmuh a nih thu an sawi a. Kan ram thuneitute hnenah hlan turin thil kalpui mek a ni,” a ti.
Pathianni khan union minister leh Arunachal MP Rijiju hian mi bote chungchangah hian Indian Army-in PLA hnenah zawhna a zawh thu leh an chhanna ngaihchan mek a nih thu a lo sawi tawh.
Heng thalai panga ram vak bo tate hi an chhungte chuan Chinese sipaiten ramri bul, Upper Subansiri district atangin an ru bo niin an sawi a, Nacho khuaa mite an ni.
“Indian Army chuan ramria duty PLA hnenah hotline message a thawn tawh a. An chhanna nghah mek a ni,” tiin Rijiju hian Twitter-ah a tar lang.
Inrinni khan district police thuneitute chuan district khawpui, Daporijo atanga hmar lam km 120 vela hla, Nacho-ah hian thil enchiang turin police an lo tir tawh bawk.
Tar lan tawh angin thalai bo mek nia sawite ruala kal ve, an thiante pahnih chu an tlanchhe hman a. An khuaa mite hnenah an thil tawn chu hrilhin Sera-7 area an tih, Nacho atanga hmar lam km 120 vela hla, ramria Army an patrol-na thin hmun atangin an thiante hi hruai bo an nih thu an sawi.
China-in Arunachal thalaite an ram china an kawl nia a sawi hma lawk hian China chuan engmah thil thleng an hriat ve loh thu an sawi hman a. A hnu lawkah Indian Army-te an chhannaah an ram chinah hmuh an nih thu a sawi lehnghal thung.
China-in sipaite a chhannaah hian Arunachal Pradesh thenkhat pawh an ram a nih thu an sawi bawk.
“China hian ‘Arunachal Pradesh’ tih hi a chhinchhiah ve thin dan a ni ngai lo va, China ram chin, Tibet chhim lama awm niin a hre thung. Indian Army-in helai bawra Indian panga bote chhuah tura PLA hnenah thu an thawn hi engmah hriat kan nei lo,” tiin Chinese foreign ministry thupuangtu, Zhao Lijian chuan a sawi niin Chinese sorkar enkawl ni tin chanchinbu, Global Times chuan Twitter-ah a tar lang.