Everton in huntawp dawn lamah goal thum an khung a, inkhel hmuhnawm leh boruak sangah Newcastle United lakah hnehna changin Premier League atanga tlak hlauhawm dinhmun atangin an inhlang chhuak.
Merseyside khaw club hi Premier League in sum lama inkaihhruaina dan an bawhchhiat avangin point 10 paihsak an ni a, league table-ah 19-naah an tla thla. Nimahsela Ningani zan league inkhelah goal thum khungin 3-0 in Magpies an hneh a, relegation zawn an chhuahsan.
Goodison Park-ah Everton hian Kieran Trippier tihsual vawi hnih atang goal an khung a. A hmasa zawkah Dwight McNeil chuan ball laksakin an goal hmahruai minute 79-naah a khung.
Minute 86-naah Abdoulaye Doucoure hun thleng ve in a huntha neihah chiai miah lovin goal hnihna a thun a. Huntawp dawn hun pekbelh minute 10 chhungin Beto chuan a league goal hmasa ber ni turin an goal hnuhnung ber a khung leh bawk.
Newcastle United hi inhliam in an squad nasa taka a tihbuai a ni a, tunhnaia an inkhel hnuhnung pathumah player thlak kual thei lovin starting XI ngai an ring a. Hei mai ni lovin substitute bench atanga dahluh tur player tawnhriat nei tawh an awm mang lo.
First half-ah khelchhe lo mahse an player-ten minute an khelh hnem chu an taksa in a tlin lo tih a tawp lamah a lang a, Everton in remchang an la.
Toffees in an ‘gameplan’ an tihlawhtling tha hle a, goal hlauhawm insiam fovin chance tha an neih khung loh an nei nual.
Everton manager Sean Dyche chuan, “Mi tam takin engtinnge kan dinhmun tha lo kha kan thlak danglam tiin min zawt thin a, a pawimawh ber chu goal a ni. Hei aia tha a khelh a, hnehna chan loh kan nei fo. Tunah erawh goal kan khung theih avangin result kan nei thin.” tiin a sawi.
- Spurs an tlawm leh tawh
Tottenham Hotspur in season bul an tan that hle hnuah an tlakhniam lai an tawng mek a. Match nga chhunga a vawi li nan tlawmin West Ham United lakah 2-1 in an chak lo.
Tottenham Hotspur Stadium-ah Spurs tan defender Cristian Romero chuan minute 11-naah an goal hmahruai a khung a, Pedro Porro corner pet a tauh lut.
Second half-ah Hammers in minute 52-naah Jarrod Bowen hmangin goal an khung a. MInute 74-naah Spurs defender Destiny Udogie tihsual atangin James Ward-Prowse chuan an chakna goal a khung.
West Ham United manager David Moyes chuan, “Kan tan result pawimawh tak a ni a, he team laka chak hi result tha tak a ni. Kan tlo na leh kan inkhelh danah fing taka kan tih tur kan ti thei kha ka lawm a. Tlarhnungah kan nghet a, goal nawr lamah kan hlauhawm em em thin bawk.” tiin inkhel a thlirlet.