Sawrkar thar kan nei ta a. Chief minister thar Lalduhawma chuan a sawrkar kalphung tur engemaw zat a han puang a. A thupuan zingah inrenchemna lam an kalpui nasa dawn tih thu a han puan chuan mipui lawm a hlawh hle in a lang a. A taka an kalpui ngei pawh beisei ila.
Kan ram sum leh pai dinhmun chhe lutuk siamthat hi thil huphurhawm tak, kan tih loh theih siloh ani tih chu kan hre vek mai. Sawrkar kan lo neih tawhte pawh khan an hai lova. Mahse, lalna leh thuneihna dinhmuna han din hian a kawng awlsam leh nuam lam zawh mai hi a awl zawk a. Hlim tlanna zawk a lo ni bawk a. Sum harsatna siamtha tura hmalak ai chuan kaldan pangngaia kal mai kha a nuam bawk a ni. Mahse, damlo nasa tak, zai ngai tawh inzai hupurh vanga tawrh ngawta a tawpa thih nghah ang deuh hial hi kan ram sum dinhmun hi ani tawh a. Chuvangin, a na emaw na lo emaw, inzaina dawhkanah kan mut phawt a ngai. Huphurh vanga ngawih ngawt theih ani silo. Kan tuar anga, kan damchhuahna kawng kan zawn a ngai ta a ni.
An sawi tawh thin angin, eng harsatnaah pawh hruaitu hian hma an hruai a ngai a. Sum harsatnaah kan hnathawktu sawrkar hnathawkteah bul kan tan thei lova. Kan hotute hian inhrekna bul an tan dawn a. Hotu hmahruai hi a lawmawm a. Hotuten mahni inhrek lova, hnathawktute an hrek hmasakna a hlawhtling ngai lova. Hnathawktute pawhin a takin an zawm ngai hek lo. Ram hruaitute leh hnathawktuten ram sum leh pai dinhmun hrechianga, inrenchem a ngai e an tih rual hian mipui tan pawh a pawmawm hle. Mipui pawhin sawrkar hmalakna hi zui tum ila. Eng level ah pawh inrenchem hi kalpui ila. Kohhran, NGO pawhin kan zawm ve ang a. Mipui rilru zawng zawngah inrenchemna hi thupui anih chuan kan ram hi he dinhmun khirh tak atang hian kan chhanchhuak ngei ang tih i beisei tlat ang u.