Citizenship (Amendment) ACT duh loh lantir nana cartoon eng emaw zat pho chhuaka social media-a vawrh darh chungchangah heng cartoon ziaktu, Nituparna Rajbongshi chu a buai phah thei mai thei.
Kum 38-a upa, chanchinbua lo thawk tawh thin, Assam-a Barpeta district-a awm hian December 31, 2018 atang khan cartoon chi hrang 7 zet ziakin social media-ah a pho chhuak a. Heng zinga pakhat phei chu chief minister Sarbananda Sonowal-a lem, ruaka a awm lai a ni nghe nghe.
Twitter hmangtuten a cartoon ziah hi an tidarh a. Tinsukia-a Bhartiya Janata Yuva Morcha (BJP thalai)-in FIR an thehlut tawh a, Assam Police chuan Rajbongshi hi an chhui mek zel a. Digboi-a tlangval pakhat, Facebook-a cartoon pho langtu pawh an man tawh a; mahse, finfiahna tha tawk an neih loh avangin an chhuah leh.