Indian cricket-a a hun laia tantu leh duhtu ngah tak, Sourav ‘Dada’ Ganguly chuan Tripura Tourism Brand Ambassador atana ruah a nih thar angin Tripura a tlawh dawn.
Indian Cricket Team captain hlui, Ganguly hian Tripura Tourism chu India ram chhung bakah ram pawn thlenga a feh chhuahnaah a thehlar dawn a ni.
Ganguly hian Thawhtanni hian Tripura a thleng ang a, ni hnih chhungin a campaign-naa a hman tur thil hrang hrang tlawhin an state-in mi tlawh châk chhan tur a neihte a fang dawn a ni.
Khualzinte tlawh thin hmunte a fang a, mi pawimawhte nen hun hmangin mi pawh a kawm kual dawn niin Tripura Tourism Minister Sushanta Chowdhury chuan Geetanjali Tourism Guest House, Agartala-a Pathianni chawhnua thuthar lakhawmtute a kawmnaah a sawi.
Thawhtanniah hian Ganguly hi zan dar 6:00-ah MBB Airport, Agartala-ah a tum ang a. Ujjayanta Palace tlawh nghalin dar 6:30 leh dar 7:20 inkarah thuthar lakhawmtute a kawm zui ang.
Chief Minister Dr Manik Saha nen dar 7:30-ah an inkawm leh dawn bawk a ni.
Thawhlehniah hian zing dar 6:00-ah Chabimura, Gomati district panin a chhuak zui ang a. Zingah hian ram mawi tak, Chabimura-ah hian thla pawh a la nghal ang a. Thla lak hi zing dar 8:30 leh chawhma dar 11:30 inkar vel tura ngaih niin dar 11:45-ah Agartala a pan zui leh dawn a ni.
Chawhnu dar 2:00-ah Agartala-ah chaw chhun a fak ang a, hemi hnuah hian thil dang pawimawh tak tak ti zuiin Ujjayanta Palace-ah pawh thehlar tur thla a la leh ang a. Zan dar 7:55-ah Kolkata panin a chhuak leh dawn a ni.
Ganguly leh Tripura Tourism thawhhona hian an state-in khualzin tlawhtu a neihna kawngah nasa taka hma an sawn theih phah an inbeisei a. India ram mai ni lo, ram pawn atang pawhin mi an hip theih phah an beisei.
Khawvel huap pawha cricket-a hriat hlawh, Ganguly hian Tripura-a khualzin tam zawk a hip luh leh an thil nei leh khawsak phungte chu zau zawka a thehlar ngei an ring a ni.