- Lallunghnema, Charity Lodge
Kan ti nek nek a,2023 kum tawp chu kan lo thleng leh tep ta! Ba hlah lovin consumer article pawh Pathian zarah ka ziak ve thei zel.Consumer Huang hi vawi 49 zet zawt ka nei thei a ni a.Ka lawm em em a ni.Chu bâkah consumer issue leh consumer right buaipuiin ka hman hlel thei bawk a! Heng consumerte chanvo leh dikna ka buaipui theih na chhan hi eng lai pawha ka bula ding reng thawhpui tha tak ka neih vang a ni. Anni hi ka tan an hlu êm êm a ni.Tin, kumin chhung hian Centre For Comsumer Education Registration pawh kan tifel bawk. He Centre hmang hian hma pawh kan la chak thei leh zual turah ka ngai a ni.
Tun hnaia consumer mi lar tak pakhat hlawhtlinna hi entawn tlâk tak a ni a. Chuvangin ka han tarlang dawn a ni. Amah, he Consumer hian a ruh langa sawi tha a tih avang leh tul a tih hial zawk avangin ka han au chhuahpui ang e. Dawrkai sumdawng hming erawh hi chu ka tar lang rih lo ang.A tul ber lem love,ka ti a ni.
Tin, he ti hi a ni a, mi pakhat a hming Pu P. L. Liandinga, Khatla South-a cheng hi a awm a. Consumer right ngai pawimawh mi a ni a, rinawmna leh dikna chawi sang mi a ni bawk. Pu PL a hian ni kum, November 2022 thla khan Fridge tha tak mai hi a lei a. He a bungraw lei hian free gift atan ‘mini fridge’ a chhawm tel a ni âwm e.. Amaherawh chu, he bungrua an le lai hian free gift chu a dawng lova. He Consumer pa thil leina dawr hian chhuanlam eng eng emaw siamin kum khat thaw thâng an customer Pu PL-a te chu an pe thei lova. Vawi eng emaw zat an inbiak hnu pawh chuan free gift chu an kawtkai a thleng thei lo!
Tichuan, Pu PL-a hian he thu ziaktu, Consumer Activist hi a va pun a. Ani Consumer Activist chuan Dawrkai sumdawng Fridge zuartute chu a va be ve a. Eng harsatna nge an neih a, chu chen chen free gift chu an la pek loh tiin a va zâwt a ni.
“Hetianga thil intiam a, tihsak leh loh hi Consumer Protection Act 2019 kalh a ni a; Dan bawhchhiatna a ni asin ; Sap tawngin, “the use of deceptive, fraudulent or unethical methods to gain business advantage or to cause injury to a consumer.,” tih a ni. Chuvangin intiam mai mai loh tur a ni,” tiin a va biaksak ve leh a.. Fridge Dawr neitute hian November thla ral hmaa free gift chu pek an intiam leh ta a. A tawi zawngin sawi ila,November ni 30-ah P. L a te hian mini fridge chu an hmu ta a nih chu!. An lawm hle tih thu Pu P. L a hian a sawi chhuak a. He thu ziaktu hi an hlawhtlinna hi hrilh a ni a. Hei hi consumer-te hlawhtlinna ropui tak chu a ni. Hlawhtling tur chuan huaisen a ngai a, rinawm a ngai a, dikna tan ngam a tul bawk.
He tih lai hian Dawrkai sumdawngte pawh hi an rinawm a ngai hle a ni. Rinawmna hi Hlawhtlinna bul a ni tih hre mawlh rawh se. He consumer hlawhtlinna hi media hrang hrangah vawrh darh a ni a. Pu P. L.a duh dan pawh a ni. Ani ang mi huaisen hi ramin kan mamawh ngawih ngawih a ni. Kum eng emaw zat kal ta pawh khan he thuziaktu thurawn angin Balu trip khat a lo thawn kir tawh bawk. Pu P. L hi i entawn luih luih ang u. Kan zia mai ang.He Dawrkai sumdawng Fridge zuara ei zawng message ka dawn hi a ngai ngaiin ka han pho chhuak ang e, aw!
Dawrkai nu,”Hello, Pu Lunghnem good morning aw, kar hmasa Thursday khan Pu P. L. a te mini fridge chu a lo thleng a, a tukah fridge kha an lo lam tawh e aw”
Keimah, “Min hrilh a, an lawm khawp mai. Dawrkai fel in ni e. “
Dawrkai nu ,”Ka lawm e aw. “
I chhiar leh atan hei chauh hi ka’n zep ang e.
Vai rama consumer case bawk a ni. www.decanheralh.com in a tarlan danin Bangalore 1st Additional District Consumer Disputes Redressal Commission chuan retailer pakhat chu carry bag man a lâk avangin Rs. 8000 a chawitir a ni. Customer Somashekar Reddy KV, Avenue Road a cheng chuan Yelahanka hmuna SPAR Hyper market a dawrkai sumdawng pakhat hnen atangin Rs. 3037 man thil chi hrang hrang a lei a, chutih rualin carry bag Rs. 22/- man lei luihtir a ni a. Nasa taka a complaint hnu pawhin a sâwt lova. A lungawi lo chuan Consumer Commission hmaah he retailer(dawrkai) hi a khing ta a ni.
Consumer Commission chuan he Retailer hi Rs. 8000/- a chawitir ta a ni. Mizoramah hian Carry bag man kan chawi thin em kha?
Danin eng nge a sawi
- Retailer tupawhin an inzawrhna a,(advertisement / logo/insignia tarlanna carry bag chu a thlawnin an pe tur a ni. Dan lova pawisa lâk hi unfair trade practice a ni a; Consumer Protection Act bawhchhiatna a ni.
Tâwk tawh rawh se. Chawlhkar lehah kan ti ti ho leh dawn nia.
I thil lei leh hmannaa harsatna i nei hlauh a nih chuan Centre For Consumer Education pan thin ang che.
Note : Tun hnaiah vanduai thlak takin kan chhungkuain chhiat kan tawk a.Dec 4-ah ka nau F.Lalhmangaiha chu Zemabawk Cancer Hospitalah a boral a.A fap Zodinthara chuan ni 6-ah ZMC-ah chatuan ram min pansan ve leh bawk a.Kan khua Thingsaiah anni pa fa ruang hi lak chhoh a ni a. Hetiang lusun boruak hnuaiah hian tun tum chu ka Column hi ka puitlin thei lo mai âwm mang e,ka ti a. Mahse, Pathian tanpuinain ka han puitlin thei a, ka lawm em em a ni.- llh