Fai tumin India-in hma a la mek a, tun hma zawng ai chuan khawi laiah pawh fai tuma beihna hi a nasa tawh a. Khawpui lian ber zinga mi, Pune-ah chuan khawlaia chil chhak mante chu a hremna a nep dawn ta lo hle a, pawisa an chawi bakah an chil chhak chu tihfaitir zel an ni tawh dawn.
Pune Municipal Corporation (PMC) hnuaia solid waste management department chuan a hmain khawlaia chil chhakte chu pawisa an chawitir thin a; mahse, khawpui thianghlimna kawngah a thawh hlawk tawk loh avangin ruahmanna thar hi an nei ta tih solid waste management department-a an hotupa, Dnyaneshwar Molak chuan a sawi.
Inhremna dan thar hi kar kal ta chhung khan ward panga – Bibwewadi, Aundh, Yerawada, Kasba leh Ghole Road-ah te an hmang tan tawh tih a sawi.
“Ni riat liam ta chhung khan PMC sanitation inspector-te chuan khawlaia chil chhak hi mi 156 vel an man tawh a, an vai hian tihfaitir bakah Rs 150 zel an chawi a ni,” tiin Molak chuan a sawi.
Hetiang inhremna an kalpui hi sum duh vang ngawr ngawr lam a ni lo tih an sawi a, hremna na leh zahthlak anga lang thei zawk an hman hian an la man ve loh leh khaw laia chil chhak mai duhna rilru pu thinte hnenah thuchah a sawi dawn niin an ngai a. “Hremna tuar tawhte chuan a zahthlakzia pawh an hria ang a, a dawt lehah chuan chil an chhah dawn apiangin ngaihtuahna an seng nawn tawh dawn a ni,” a ti bawk.
Pune hi India rama khawpui fai ber pawl a ni a, 2018 cleanliness survey-ah pawh khan 10-na a ni phak a. Hemi tuma a sang ber chu Indore, Madhya Pradesh a ni thung.
“A sang ber nih kan tum a. Swachh Survekshan (survey) 2022 neih leh hma ngei hian nasa takin khawpui enkawltute hi chuan tan kan la dawn a ni,” tiin Molak chuan a sawi.
Tun hma deuh khan PMC hian chil chhah lohna ni (anti-spitting day) chu kar tin Nilaini apiangin an lo hmang tawh thin a, an chhunzawm tawh lo. Molak chuan chhunzawm leh pawh an rilruah a awm mek tih a sawi a, “Fai tura beihna leh inzirtirna hi a ni tin anga kalpui a ngai niin kan hria a, awareness tha tawk inpek a ngai a. Khawi lai ni khat emaw mai ruahman hi a tawk lo thei,” a ti.