Mizoram chief minister thar Lalduhawma’n CM office a luah tirh tê a a sawrkar hmalakna tur hmachhawp a sawite chuan mipui thlawp a hlawh hle a. Point hrang hrang a sawi zingah rang taka hmalak theihna tur office hnathawkte tana zawm ngei ngai a puante hian mipui ngaihven a hlawh hle. Office tinah biometric attendance system hman tur a tih hian kan sawrkar hnathawk inthlahdahte hna thawk lo thei lovin a siam dawn niin a lang.
Mizoram sawrkar hnathawkte hi thahnemngai taka thawk tam tak an awm laiin tam tak hi chu peih leh peih lo a, hlawh hmuh nana thawk an ni hlawm a. Office a thawk an nihna hian thil dang an tih an thulh phah lo a tih theih hial ang. Sawrkar office a thawk, an hlawh la ve reng anmahni hmuh tur awm mang lo pawh hi an awm teuh a ni. Chung mai nilovin, tam tak hi chu office tan hunah hian an thleng hman ngai lo hrim hrim a. Tlai lamah inthlahrunna awm hauh lovin hma tawkah an haw leh a. Hna hi an thawk tlem em em a. Sawrkar hnathawk pakhat chuan, ka hlawh zat hlawh hian mi chhawr dawn ila ka duh hauh lovang a ti thlawt a ni.
Chhun lama hnathawh hunah hian office hnathawk tam tak hi chhiatni thatniah an kal hman thei em em a. Kohhran leh khawtlang rawngbawlna lamah an inhmang hman em em tho bawk a. Hetiang vel hi kan sawrkar hnathawk tam tak awm dan a ni a. Office dawrtute tan a buaithlak thin hle. Kan mamawhah chanchin kan han zawt a. A khawihtu a chhuak, a kal lo tih hi a tam em em a. Sawrkar file a kal muang lutuk kan tih hi dawhkan hrang hranga khawihtute inchawlh chhawk zut reng mai hi a ni bawk. Hei hi kan kalphung ani a. A leh lamah mizo leh mizo, inhmaizah tawn tak, inchhungkhat kual duat duat, thawk ho ngat phei chu inhnimhnai tak, intih mualpho hreh tak kan ni a. Dik lo leh zawmthaw deuh inthup sak kan uar hle. Heng zawng zawng hian kan sawrkar hnathawkte a chiah reng a. Chuvangin kan sawrkar office chu a muang ta em em mai thin a ni.
Kan sawrkar hnathawkte nitin attendance chu sawrkarin office an thlen hun tur a siamah an thleng em. Bân hun hma in an haw em tih chu anmahni kutzia nemna tur emaw, anmahni ngei an inlan ani tih chianna turin biometric system a hmang dawn ta a. Hei hian kal tha leh tha lo a chhinchhiah kauh kauh tawh dawn a. He system hi miin hman a huphurh hle chuan amah a in enfiah hle a ngai tihna a ni a. He system hi mi dik leh hnathawk tha pangngai tan huphurh tur a awm lova. An hnaa an kal thatzia lanna tur a ni a. An lo duh lo hle anih chuan an thawk tha lo hle ani thung ang. System thar hi kan ram tan hmasawnna nasa tak thlentu anih ngei theih nan, tupawhin zawm tum hram se a lawmawm ngawt ang.