Home Minister K Sapdanga’n mipuiin an beisei angte tihhlawhtlin an tum dawn tih a sawi.
Nimin khan Home Minister K Sapdanga hian Police Headquarters (PHQ), Khatla tlawhin police officer-te nen DGP Conference Hall-a an inkawm a. Chief ninister-in ni 100 chhunga an tih turte a puan tawh thu sawiin K Sapdanga chuan, “Chief minister kaihhruaina hnuaiah mipuiin min beiseina angte tihhlawhtlin ngei kan tum dawn,” a ti a, police hotute chu CM-in ni 100 chhunga tih tur a sawi a, an department concern awmte tihlawhtling turin a chah.
Amah mai chuan mipui beiseina ang a tihhlawhtlin theih dawn loh thu sawiin home minister chuan, “Thawhhona tha tel lo chuan department-in hma a sawn lo ang. A tuar tur chu mipuite an ni. Mipui himna atana thawk turte kan ni a, mipuiin min en sang. Chuvangin, keimahni vangin mipuite an thla a muang tur a ni,” a ti.
Home minister chuan ruihhlo do kawngah theihtawp an chhuah dawn tih sawiin, “Police-te in thawkrim em em tih ka hria. Mi sualte hi an fing ve zel a; chuvangin, hma kan sawn ve zel a ngai. In laka thupek pe ringawt tur ni lo, thawhpui tur cheu in ka awm a ni,” a ti a, Mizoram hmasawnna atana thawhpuiah a sawm.
K Sapdanga chuan tul loah inkhawhral tur a nih loh thu sawiin, “Inrenchem taka kan kal a ngai. Tin, sum lakluhna tur lamte ngaihtuah a, kan resource-te kan hman tangkai a tul. Kan thil tumte a hlawhtlin theihna atan min puih kan ngai. Engtik lai pawhin in rawtna leh thurawn engtik lai pawhin ka dawngsawng thei reng a ni,” a ti.
Inkawmhona kaihruaitu DGP Anil Shukla chuan police an indaih loh nasat thu sawiin, “Sanction post atangin 33% vel hnawh khah lohin a awm. Tin, police modernisation scheme-ah state-in 10% pawh kan pek theih loh avangin sum hmuh tur la hmuh loh Rs. vbc. 9 vel a awm,” a ti a, building lamah pawh harsatna an tawh thu a sawi.
Home minister leh police hotute inkawmhonaah hian IGP (Hqrs.) Lalbiakthanga Pachuau chuan police dinhmun tlangpui, an hmalakna leh hmachhawpte a sawifiah.