Spanish champion FC Barcelona chuan zanin a khelh tur UEFA Champions group stage a an inkhel hnuhnung ber atan Belgium-ah first team player pariat an hruai tel lo.
Barcelona hi round of 16 atana tling chiang tawh an ni a. Tun Pathianni khan league hmahruaitu Girona lakah an tlawm a, hei vang hian coach Xavi Hernández chuan league inkhel ngai pawimawhah a player thenkhat chawlh hahdamna hun a siamsak.
First team player pawimawh Robert Lewandowski, Frenkie de Jong, Ilkay Gündogan leh Ronald Araújo te awl tir an ni a, Marc-André ter Stegen, Marcos Alonso, Iñigo Martínez leh Gavi te erawh inhliam avanga chhawr theih an ni lo.
An aiawh turin Xavi chuan academy player pariat lai first team atan a ko chhova. Defender Hector Fort leh Pau Cubarsi, midfielder Marc Casadó leh Aleix Garrido te bakah forward Angel Alarcon leh Marc Guiu te telin Guiu hian October thla khan first team tana a inkhelh hmasak berah goal a khung nghal a ni.
Anni bakah hian goalkeeper Ander Astralaga leh Diego Kochen te pawh ko tel an ni bawk.