Aizawl: Mizo Zirlai Pawl (MZP) chuan nimin khan an president H Lalthianghlima hovin Zokhawthar leh a chhehvela sahima zawnga Myanmar atanga raltlante awmna hmun hrang hrang an tlawn a, an harsatna tawhte an enfiah.
Myanmar raltlan awmna te an tlawn kualnaah MZP President chuan raltlante chu thlamuang taka awm tura chahin, “Zofate hi hmun hrang hrang a awm kan ni a, kan unaute an nat chuan keini pawh kan na a. In harsatna chu kan harsatna a ni a, theihtawpin hma kan la zel ang,” a ti.
Zokhawthar chheh velah raltlan awmna camp hrang hrangah hian chhungkaw 700 chuang awmin, mihring 3000 chuang an awm niin MZP hotute’n an sawi.
MZP chuan Mizoram sorkar thar pawhin Myanmar raltlante chhawmdawlna kawngah theiha hma la a, raltlante awmna pawh a rang lama tlawha an harsatna tawhte sutkian pui turin an duh tak zet tih an sawi.