Mizoram Legislative Assembly Speaker atana lak luh thar Lalbiakzama’n Speaker chair a luah chhungin fair leh inkhairual taka dan hnuaia kalpui a tum thu leh neutral taka kaihhruai a tum thu a sawi.
Lalbiakzama chuan Speaker atana lak luh a nih zawh hnu nimin chhun khan a pisa ah thuthar thehdarhtute kawm nghalin, neutral taka rorel kaihhruai a tum thu hi a sawi a. Sorkar kal tawha roreltuten theih tawp chhuah mah se mipuiin an duh khawp lo a, ZPM ah rinna leh beiseina sang tak neiin thuneihna an kutah an pe ta tih a sawi bawk.
Assembly speaker chuan, sorkar in ruahmanna tha tak neiin tumna tak tak nen kalpui mah se a hlawhtlinna chu mipuiah a in nghat tlat tih a sawi a, Thlan tla in thahnemngaihna nen thawk ila, kan ei leh bar zawnna ah te tihtak zet in kan theihna zawng zawng pe ila, malsawm tlak a kan hun te kan hman chuan Lalpa a chuang tawh mai dawn, a ti a, mipuite pawhin an tih theih ve reng sorkar tih tura dah tlat te, a thlawna dawng tura in ngaihna te chu an kal pelh a hun tawh tak zet tih a sawi bawk a ni.
Speaker thar Lalbiakzama chuan Assembly Session neih zawh a, thuthar thehdarhtute a kawm zawh veleh Mizoram Legislative Assemby-a Speaker hmasa ber Dr. H.Thansanga hnenah thurawn leh malsawm tawngtaina dawng turin enkawl a nih mekna Synod Hospital ah a tlawh nghal a ni.
ZPM party in duhsakna hlan
ZPM chuan Speaker atana thlan tlin Lalbiakzama chu house zahawm tak, dik tak leh fel fai tak, thlei bik leh duhsak bik nei lova a kaihhruai theih nan leh House zahawmna a vawnhim zel theih nan duhsakna an hlan.
Assembly Speaker Lalbiakzama hi March 1, 1965-a piang a ni, tunah hian Chanmari West, Aizawl-ah a nupui fanau te nen chhungkuain an khawsa mek a ni. Thiamna lamah B.Com niin, eizawnna lamah sumdawng mi a ni.
Kohhran lamah United Pentecostal Church (NEI) niin, tunah hian DEACON (Kohhran Upa) ni mekin, Chairman, Aizawl East District Headquarters nihna a chelh mek.
Kum 2003 khan Tlungvel A/C leh kum 2013 khan Tuichang A/C atangin ZNP ticket-in MLA candidate a lo ni tawh a. Tun tumah hian ZPM Party ticket-in Chalfilh bial atanga thlantlin a ni.