Zote Toyota Mizoram Premier League 10 atangin FC Venghnuai chu an tla a. Aizawl FC lakah round hnuhnung bera an tlawm avangin an dinhmun a chiang tawh.
Nilaini ah Rajiv Gandhi Stadium-ah ‘relegation battle’ inkhel pathum zinga pahnihna khelh a ni a. Semi-final luh tum Aizawl FC 2-1 in an chak.
Thawhlehni khan tlak hlauhawm a awm tho Project Veng FC in tling chiang tawh Mizoram Police chu 5-1 a an hneh ve bawk avangin Venghnuai dinhmun a chiang.
Season hmasaah final an khel a. Kuminah erawh team dangte an inlak that avangin an tan chona a lian. Chutihrualin football huaisen khel thin an ni a, Aizawl FC in I-League an khelh bawk avangin ‘chance’ an nei tih an inhria.
Aizawl FC in second half-ah minute thum chhungin Augustine Lalrochana hmangin goal hnih an khung a. Hei hi J. Lalbiakliana’n minute 69-naah Venghnuai tan goal khat khungin a chhanglet.
Huntawp dawn thleng Venghnuai in huaisen takin an bei a. Aizawl FC lakah goal chance engemaw zat siamin huntawp dawn hun pekbelhah goal bar an tih per bawk.
- Engtin zel?
Project Veng FC in Police lakah Jessie Lalmawizuala, Jack Lianlalmawi, Jehova Lalthansanga leh Lalfakkima te goal bakah Ronald Zothanzama an nei a. Hnehna an chan avangin dinhmun thaah an indah.
Nizan inkhel hnuhnung zawhah Electric Veng FC leh Chawnpui te an inkhel a. Hetah hian EVFC an chak chuan Kolasib club in Playoff an khelh a ngai ang.