Guinea ram chuan mi pathum an thih hnuah Pathianni khan an ramah Ebola hripui a leng leh ta tih an puang.
Heng mi pathum bakah mi dang pali chu nurse thi vuinaa an tel hnu lawk atangin khawthalo, luak leh thisen putin an awm tih thuneitute chuan an sawi.
World Health Organization (WHO) kaltlangin invenna damdawi siam thar chu rang taka an mamawh nghal thu an sawi bawk.
Kum 2013 leh 2016 inkar khan Guinea ram atanga intanin Ebola hi Africa khawmualpui khawthlang lamah a leng chiam a, mi 11,000 chuangin an thihpui.
He hri leng hi a intanna, Guinea leh an thenawma Liberia leh Sierra Leone chuan an tuar na ber a. Invenna damdawi siam tuma nasa taka beih niin enchhinna pawh kalpui a ni a, an siam thar chu tun hnaia Democratic Republic of Congo-a a len tumin hmeh mihna hmanrua atan an hmang.
Guinea-a WHO palai, Alfred George Ki-Zerbo chuan, “WHO chuan kan ngaihvenin vaccine siamtute pawh kan bepawp tawh a, dose mamawh zat pawh a rang thei ang bera a lo thlen beisei a ni,” tiin AFP news agency hnenah a sawi.
Ebola vaccine hi kum 2015 khan Guinea-ah thla li chhung enchhin a ni a, hei bakah hian a kaite enkawlna damdawi, an dam chhuak an tam phah tak pawh siam chhuah a ni.
Chhimchhak lama Nzérékoré khawpui bul lawk, Goueké-a health centre-a thawk pakhat chu January 28 khan thiin ni li hnuah vui a ni.
Mitthi vuinaah hian mitthi ruang chu a kalten an bual faipui thin a, hei hi Ebola darh theihna lian tak a ni.
A kaite ruang hi a hlauhawm hle a. Mi danga kai tura a hlauhawm hun lai hi ni hnih atanga ni thum vel a ni.
Ebola hi a kai ramsa, a tlangpuiin chimpanzee, fruit bat leh forest antelope taksa atangin mihringah a kai thgin a. Mihring vulh ni lo ramsa, mihringin ei atana an veha an thah thin chu Ebola inkai darhna remchang tak a ni bawk.
Mihringin a kai tawh chuan mi dangah thisen, taksa atanga tuiril chhuak leh an awmna hnu atang ringawt pawha inkai theih.
A kai nurse thi hi kum 25 chuang awrh chauh niin thuneitute chuan an sawi.
Hri a leng tih an puan hnua vawiina health ministry thukhawm chuan a kaite chu an dah hrang nghal vek a, an hnuhma an chhui zui a, Goueké-ah enkawlna hmun (treatment centre) an siam nghal bawk.