Aizawl: Champhai Grape Growers Society hruaituten nimin khan Chief Minister Lalduhoma chu a pisa-ah kawmin, an harsatnate an thlen.
Champhai Grape Growers Society hruaitute harsatna a ngaihthlak hnuah chief minister Lalduhoma chuan, an hmunhmate a lo tlawh fo tawh avangin harsatnate a hriatthiampui thu sawiin, “In thlai tharte tha taka in hralh theih nan, sorkarin tih theih a neih te chu a indawtin tih chhoh zel kan tum dawn a. Tunah erawh chuan sorkar thar kan kalpui tan chauh a ni a, sum leh pai lama intiamna ang chi chu engmah kan tithei rih lo. Inpuih theih hun erawh chu a la awm em em ang. Chu hun chu i nghak hram hram ang u,” tiin, an sawi fo thin angin kum khat tal insawhngheh nana hman an mamawh thu a hrilh.
Champhai Grape Growers Society hruaitute hian an society tana chief minister-in hma a lo laksak tawhte an hriatreng thu sawiin, lawmthu an hrilh a. An harsatna hrang hrangte chu ziakin an thlen nghal.