Mizo mipuite hian khawchhak ramri a awm kan nih ang ngeiin thil tam takah khawchhak zar kan zo a. Kan mamawh tam tak chu khawchhak atanga lokal ani fur mai. Kan bazarah pawh khawchhak lam bungraw zuara eizawng an tam em em a. Chhungkaw tam tham tak inchawmna a ni. Tun hnaiah sawrkar tharin khawchhak lam sumdawnna lam an hawi a. Thil tha lo inzep tam lutuk chu ngaimawhin hma an la ta a. Mipui pawhin an thlawp hle niin a lang.
Sawrkarin khawchhak kuhva a sumdawn chu kan ram tan mai nilo, India sawrkar tan pawha pawi khawih tham ani tih hriain tih tawp tumin hma a la ta a. He sumdawnna hian kan ram a khawihchhiat dan hi a namai lo hle a. Mihausa leh pawisak nei lo te in lengna ramah min siam ani ta ber mai. Sawrkar pawhin tih ngaihna an hre tawh lova. Kan sawrkar kalta Home minister pawhin mit kan siai khum ani a tih hial kha a ni a. He sumdawnna hian kan ramah dik lo taka hausa thut thut a siam tam em em a. Chutianga dik lo taka hausa thut thut tamna ramah chuan a dawt lehah dan leh thupek a buai zui thin tih kan hria a. Khawvela ram nuam lo leh dan leh thupeka buai ber ber Latin America ram te kan thlir chuan hetiang ang ram nih hi kan hlat lo tih kan hre thei ang. Sawrkarin dan a lekkawh thei tawh lova. Smugglers ten an duh angin ro an rel ani ber mai. Sawrkar hmanrua police te an control tel a. Chumi chungah chuan politiciante awmin mipui chu misual rual rorelna hnuaiah an awm ani ber. Nikum lawkah khawchhak lam kuhva sumdawnna kaihhnawihah Champhai DC chu a tal buai hle a. District thuneitu ber ni siin a hnuaia police pawh a control thei tawh lo anih kha. Smugglers ten kawng an zawh ngam tawh a. TV ah an interview ngam tawh a.
Police an hlau lova. Tumah hlauh an nei tawh lo. Ngaihtuah chian chuan ram hrehawm ber pawla sawi Columbia kan ang ta khawp mai. Sawrkar tharin huaisen taka kuhva sumdawnna do tura hma a la hi a fakawm takzet a ni.
Smuggler te hi mi â an ni ngai lova. Chhuanlam chi hrang hrang hmangin hma an la dawn a. Chumi khami pawh an khap lo tih vel chu an sawi hmasak tur a ni. Mahse, mipui mamawh bungrua leh mipui tana tangkai miah lo sumdawnna hi kan thliar thiam a ngai a. Foreign bungrua zawng zawng ang khata sawi luih tlat hi smugglers te tih tur reng a ni. Chumi a lo thliar hran thiam ve chu mipui pawhin kan thiam a ngai. Khawchhak atanga lokal nihawichi, hairep, kuhva leh heroin te ang khata kan sawi lui tlat duh anih chuan kan thlir dan chuan kan ram tan pawi a khawih ani tih i hria ang u.