MPCC Sr. Vice President Lal Thanzara’n ZPM sorkar chu kal dik tum hle mah se, an kal dik a rinawm loh thu a sawi.
Zirtawpni khan MPCC chuan Friday Political Session chu an party pisa-ah an nei a. He huna thu sawitu MPCC Sr Vice President Lal Thanzara chuan ZPM sorkar kan hrawn mek chu kal dik an tum hle tih sawiin, “Chutih laiin, hun kal tawhah Val Upa Council thu an zawm loh dan te ngaihtuahin an kal dik a rinawm lem loh a ni. Inthlanah khan ZPM party chu BJP pawisa an hmang tih te sawi a awm a, an hman leh hman loh chu kan hre chho zel dawn a ni. Chuvangin an kal dan hi ngun takin kan thlir zel dawn a ni,” a ti.
Lal Thanzara chuan ZPM ten MLA thahnem tak neiin rorelna an chang tih sawiin, “Mipuiin enchhin an duh a, tunah hian kan enchhin chho mek a ni. Chuvangin, Congress party mi leh sate pawn he enchhinna hi hmang tangkai turin ka duh che u a ni,” a ti.
Congress sorkar loh avangin zam mai lo tur leh hma lam pan nana hmang turin party mite chahin, “Pathian hun ruatah Congress Party hi ram hruai turin min ruat rih lo tih pawm ila, i zam lo ang u. Keini chu Pathian zai ngai, Pathian hruaiin kan kal ang,” tiin Lal Thanzara’n a sawi bawk.
Tihfuh tam tan politics khelh chi a nih loh thu sawiin MPCC Sr Vice President chuan, “Ram leh hnam vei mite tana khelh chi a ni. Tih fuh tum te chu party hrang hrangah an zuang lawr dun dun a, ram leh hnam tan an chhenfakawm loh a ni. Kan sorkar loh vanga party danga awm kual te kha a malsawm lo a, nghet takin i Congress ang u,” a ti.
MPCC chhung inkhawm hi Benjamin Thansanga, General Secretary in a kaihruai a, Lalrindika Ralte, Ex-MLA, MPCC Genral Secretary ni bawkin thu a sawi bawk.