Aizawl South II bialtu MLA Lalchhuanthanga chuan nimin khan a bial chhunga Central Scheme NEST hnuaia Social Welfare & Tribal Affair building sak mek, Eklavya Model Residential School, Tlangnuam Aizawl chu tlawhin harsatna an neihte a hmunah a enfiah.
Lalchhuanthanga chuan, “Sorkarin hetiang ro tling kan tu leh fate tan pawh a chhenfakawm tur ka bial chhunga kan nei hi ka ngai pawimawh em em a, tha takin hna thawk ula ka duh,” tiin, building sak hna thawktute chu an harsatna hrang hrang te sutkian anih theih nan hma lak a tum tur thu a hrilh.
MLA hi Aizawl South-II ZPM Block hruaitute, khawtlang hruaitute, PWD hotute, P&E hotute leh Social Welfare & Tribal Affair Department lama hotuten an tawiawm a ni.
Eklavya Model Residential School sakna hmun hi Aizawl Tlangnuam Veng YMA in ram an pek niin, NEST Central Scheme hnuaiah Rs vbc 24 hmanga hnathawh mek a ni a. DJ Consultancy Farm-in a sak hna hi an thawk mek a ni.