Aizawl: BJP Mizoram President Vanlalhmuaka chuan Mizoram leh mipuiten tun huna an mamawh ber chu mitdawivaih state sorkar politician ni lovin, ram leh hnam tana chhenfakawma hnathawk thei sorkar, BJP anga mahni manifesto tipuitling thin sorkar a nih thu a sawi.
Nimina BJP state office, Mipui Run-a chhung inkhawmah thu sawiin Vanlalhmuaka chuan, India hmarchhak zingah BJP sorkar lohna leh BJP nena sorkar siam lohna awmchhun chu Mizoram chiah a nih thu a sawi a. Inthlan laia BJP hlauhawmzia political party hrang hranin vote zawngin mitdawivaih hmangin mipui mit an tivai a. Mahse, inthlan a zawh meuha sorkarna siam a nih hnuah erawh, PM Modi sorkar hnenah Medical College leh Airport tye zuarin, pur chaw turin an intlansiak leh thung niin a sawi.
Vanlalhmuaka chuan, “Mahni aia fing zawk leh thil tithei zawk bum kan tum thin hi chu thil atthlak tak a ni. Chuvangin, politician-tena Mizoram mipuite mit min dawihvaihna thanga kan tanna hi, Mizoram mipuite hian kan men a, kan hmuhfiah thiam a, kan talchhuah a ngai tawh a ni,” a ti.
MP inthlan lo awm tur chungchang sawiin, “Kumina MP inthlanpui kan hmachhawn leh turah pawh BJP-in sorkarna kan siam leh ngei dawn a, Mizoram pawh hian MP election kan hmachhawn turah development tak kan hmuh theih nana, rilru fimtak pu chunga central sorkar BJP hi kan thlan chuan, kan ram tan hian development kailawn a inhawng ngei dawn a ni,” Vanlalhmuaka’n a ti bawk.