Pakistan Prime Minister Imran Khan-a kaihhruai party chuan nimin khan Supreme Court-ah thu thlenin president hlui leh Pakistan People’s Party (PPP) chief Asif Ali Zardari chu paih (disqualify) turin an ngen.
Geo TV-in a puan dan chuan Sindh Assembly bial atanga thlan tlin, Pakistan Tehreek-e-Insaf party mi, Khurram Sher Zaman chuan kum 63-a upa Zardari paihna tur hian an ram court sang berah hian thu a thlen a ni.
Zardari hi prime minister hlui thah tak, Benazir Bhutto-i pasal a ni a, chhim lama Sindh province atangin nikum July thlaa an inthlanah khan thlan tlin a ni.
December 20 pawh khan Zaman hian Election Commission of Pakistan hnenah lehkha thehlutin president hlui hian New York-a apartment a neih avanga chhiah chawi tur a chawi loh avangin a nihna atanga hnawl turin a lo ti tawh a. Mahse, tun thla tir khan Zaman hian a ngenna thlen chu hnukdawk lehin court lam a pan ta zawk a ni.
Zardari hi Pakistan president 11-na niin kum 2008 leh 2013 chhung khan an ram a kaihruai a ni.