Mizo thalai, entreprenuer thate sorkarin kawngka zau taka a hawnsak dawn tih Chief Minister Lalduhoma’n Anna Food Production Industry a hawnnaah a sawi.
Industrial Growth Centre-a inbun, bawnghnute kaihhnawiha thil siamna industry a hawnnaah hian Duhoma chuan ramin kuthnathawktute thil tharchhuah lo process thiamte leh mipuite awlsamna thlen thei hmalakna nei thiamte a mamawh tih sawiin, entreprenuer thate chu Hand Holding Policy hmangin ruahmanna tha tak an siam tur thu a sawi.
Khualzahawm Agriculture Minister PC Vanlalruata pawhin thu sawiin, Industrial Growth Centre-ah industry neitute an la tam loh avang leh a ti chhunte an hlawhtlin thin avangin, rawn lut hi tam zel se an duh thu a sawi a, Mizoram sorkarin loneitute tharchhuahte state pawna hralh tlak ngeia process-a tum dan te pawh a sawi a ni.
Anna Food Production dintu leh neitu, Daniel Lalawmpuia chuan an industry chu kum 2020-ah belpui pakhat leia bul an tan a ni thu leh State Bank of India puihnain industry puitling a ni chho ta tih a sawi a, tunah hian lassi an siam chhuak rih a, a bak product dang pawh siam chhoh zel an tum a ni.
Chief Ninister Duha hian nimin vek khan Luangmual Industrial Growth Centre-a AMC hnuaia Plastic Waste Management Centre sak mek a tlawh bawk a, waste management centre sak mek chinchang kimchang a hnena ziaka thlen turin thawktute hi a chah a. Plastic bawlhhlawhte kan ngah zel a, a chinralna lam mumal neih thuai kan mamawh avangin tha taka sak puitlin vat a tul thu a chah a ni.