Aizawl: Special Judge (Prevention of Corruption Act) Dr HTC Lalrinchhana chuan sum tihchingpen thubuaia chawlhkar kalta Zirtawpnia a thiam loh a chantir, LADC CEM leh mi dang pathum bakah lehkha lem hmanga zirtirtu atan leh hna dang atana lak an nih avanga thiam loh a chantir mi 30-te hremna nimin khan a puang.
LADC huam chhunga zirna in 18-a zirtirtu leh thawktu dang mi 41 te, kum 2013-a April leh May thla hlawh, Rs 1,33,56,884 chu khatih laia LADC-a Education (Middle School) changtu, Executive Member V. Zirsanga leh a thurualpui, Lawngtlai District Education Officer Lalduna Chinzah, Middle School Teachers Association, Lawngtlai President NC Muankima leh khatih laia Middle School Teachers Association, Lawngtlai Secretary C Lalchawilianate chu eirua puh niin, thiam loh chantir an ni.
Hei bakah hian Special Court hian zirtirtu ni tura lehkha pawimawh lem hmang zirtirtu 30-te chu thiam loh a chantir bawk.
Court-in thiam loh a chantir, V. Zirsanga hi hemi thubuaia a inhnamhnawihna a len tham avangin kum li chhung lung in a tang tur leh cheng nuai li (4 Lakhs) chawi turin a hrem a. Pawisa chawi tur hi a neih loh chuan kum hnih dang lung in tan in a tlak ang.
Lalduna Chinzah chu a pawikhawihna a rawva hle chungin, kum upa tawh tak kum 82 lai a nih tawh avanga hremna pe nep in, kum li chhung lung in a tang tur leh cheng nuai ruk (6 Lakhs) chawi turin a hrem a. Pawisa chawi tur hi a neih loh chuan kum thum dang lung in tang tura tih a ni.
NC Muankima chu a meizang hlaptu ber a nih avanga hremna pe na bikin, kum nga chhung lung in tang tura tih a nih bakah cheng nuai ruk (6 Lakhs) chawi tura hram a ni a. Pawisa chawi tur hi a neih loh chuan kum thum dang lung in tang leh tura tih a ni.
C. Lalchawiliana hi dan bawhchhiatna lo thurualpuitu mai a nih avanga hremna nep zawk pe in, kum li chhung lung in tang tur leh cheng nuai li (4 Lakhs) chawitir a ni bawk a. Pawisa chawi tur hi a neih loh chuan kum hnih dang tang turin court chuan a chungthu a rel.
Zirtirtu leh thawktu dang (work education teacher) mi 30-te hi an inhnamhnawihna nep deuh zawk a finfiah an nih angin, lung in a an lo tan tawh tlak tawk a hrem an nih bakah cheng nuai ruk (6 lakhs) theuh chawi tur leh an pawisa chawi tur hi an pe thei lo a nih chuan kum thum theuh lung in tang tura tih an ni bawk.