Aizawl: Home Minister K Sapdanga chuan Mizoram police te chu inthununna (discipline) tha taka kengkawh tur leh state dang police te chin tha lo chu an tih ve a rem loh thu a sawi.
Thawhtanni khan Home Minister hian G.S Arya Mess Police Headquarters tlawhin, District Executive Force (DEF) Aizawl, Lunglei, Champhai leh Kolasib-a hman tur Mobile Forensic Van pali a vailiam puala inkhawm buatsaih he thu hi a sawi a ni.
K Sapdanga chuan chuan police tanglai 8000 vel chauh awm mah se, an uniform te nawtmar a, theihtawpchhuah turin a chah a. Post awl 4000 vel awm leh thil dang mamawhte pawh a tul anga ngaihtuah zel anih tur thu te, ruihtheihthil avanga DEF leh battalion lama sipai thi an awm thin chu thil pawi tak a tih thu leh, an naute chu khawng taka enkawl a, an mawhphurhna hlen turin a chah bawk.
Home Minister in a vai liam tak, hnuchhui nana hman tur Mobile Forensic Van pathum te hi basic model niin, pakhat chu Higher model a ni a. National Forensic Sciences University, Gujarat leh Kwick Soft Solution Pvt. Chennai te kutchhuak niin, Higher model hi Rs. 82,53,482 man a ni a. Basic Model hi Rs. 44,99,999 man niin, a vaia a pali man bekhkhawm chu Rs. 217,53, 479 a ni.
‘Assistance to States for Modernization of Police’ hnuaiah Mobile Van te hi lei a ni.
He hunah hian Anil Shukla, IPS, DGP leh Lalbiakthanga Khiangte, IPS, IGP (Hqrs.) te’n thu an sawi bawk.
Home Minister hi Home Commissioner leh Home Department OSD te’n tawiawmin, Mizoram District SP, Commandant te bakah Police hotu lian an tel bawk.