Forest department-a thawktute chuan sava leh nungchate tihluma an chet vel dan video Youtube channel-a upload thin nia puh mi pahnih an man.
Heng sava leh nungcha tihluma an chet vel dan Youtube channel-a upload thin an mante hi Vanengmawia, Lungmawi, Hnahthial district leh PC Malsawmzuala, South Vanlaiphai, Lunglei distict-a chengte an ni.
Wildlife Protection Act 1972 hnuaiah Vanengmawia hi Rs. 5,000 chawitir niin Malsawmzuala hi an chhungkhaw khawsak dinhmun enin Rs. 4,000 chawitir a ni a, Youtube-a an video upload pawh delete-tir an ni a, an thangkamna hmanruate pawh mana halsak an ni bawk.
Forest department chuan tun laiin Youtuber inti mi thenkhatten channel siamin ramhnuaia nungcha an pel lai leh thang chi hrang hrang hmanga sava leh nungcha dang an tihlum lai video an upload thin tih hriat a nih thu sawiin, ramsa leh sava sa ‘mukbang’ thinte pawh a awm tih hriat a nih thu an sawi.
Heng mite hi an chhui mek thu sawiin, man chhuah an nih chuan kum thum thleng lung in tantir emaw, Rs. 25,000 thleng chawitir emaw, a pahnih hmang pawha hrem kawp theih an ni tih an tar lang.