Aizawl: Local Administration Department (LAD) Minister C Lalsawivunga’n nimin khan a department enkawl hmalakna tura hmathlir leh kalphung a duh dan te LAD Secretariat leh Directorate-a Officer-te a sawipui.
SAD Conference Hall-a thutkhawmah hian LAD Minister C. Lalsawivunga chuan department hmasawnna tura theihtawp chhuaha lungrual taka hnathawh a pawimawh thu sawiin, LAD hnuaia thawkte chu thahnemngai taka thawhpui atan a sawm.
C Lalsawivunga chuan mipui tana theihtawp chhuaha hna thawh a duh thu sawiin, dik tak leh fel taka thil ti a, rinawm taka thawk turin department Officer-te a chah a. Dan pangngaiah Ministry chu kum nga dan zela inthlak thin a nih thu leh officer-te chu nghet zawk an nih dante pawh sawiin, thawktute chu politics thli chhia inchhem len tir lo turin a chah bawk.
Thutkhawm hi Teresy Vanlalhruaii, LAD Secretary in a kaihruai a. LAD Director Rita Lalnunmawii Pachuau in PowerPoint Presentation hmangin LAD hnathawh leh mawhphurhna kawng hrang hrang a sawi fiah a ni.
He hunah hian LAD hmalakna pawimawh zual XV Finance Commission Grant, RGSA Scheme leh hmalak zelna tur kawng hrang hrangte sawiho a ni.