Assam rifles insawn tur chungchang hi Aizawl mipui hian kan buaipui rei ta khawp mai. 1988 a lammual bula mipui nen inhmuthiam lova mi 11 lai an kahhlum atang khan a intan tawh a. Mnf sawrkar khan zokhawsang a an awmna tur hi a buatsaih nghal kha a ni a. Assam rifles insawn theihna tur hian Mizorama kan sawrkar neih tawhte hian an tih tur chu an ti nasa in, a hmun pawh an peih fel viau tawh a ni.
Mahse, tun dinhmunah insawn lam hi an la sawi ri lo leh ta cheu niin a lang a. Kan chief minister Lalduhawma chuan kar kalta khan an hmun tur hi a tlawh sak leh a. A hmunhma peih a la nih loh dan lam bawk an lo sawi nawn leh ta a. Insawn hrim hrim hi an tum lovin chhuanlam an siam zel ni te hian a lang ta.
A hmunhma luah theiha siam sak hi state sawrkar tih tur chu a ni ngei mai. Tih pawh an ti zo tawh. Mahse, AR ho hian luhlul leh mi nek theihna lai zawng ngar ngar hian min khawsak khum a ni ber mai. An luah hnuah anmahni pawhin chei tur chin chu an nei ve tur a ni a. Tunah hi chuan puanthuah nena luha va mut tawp theihna an phut niin a lang. Hman deuha an sawi pakhatah chuan an inchhung electric wiring la zawh fel loh deuh kha an sawi ring hle an ti a. Internal wiring lehzel hi chu anmahni tih tur anih ngei a rinawm. Heti ringawta in luh lul khum tur em ni dawn aw tih tur a ni ta.
Dik tak chuan mipui hi kan tha a. Sipai pawh hi kawmngeih kan tum em em zel a. Mahse mipui thatna hi remchangah an la a nih hmel ta ber. Heti ringawta an khawsak luih chuan mipui rilru pawh hi an tina thei a. Lammual an control na hnuaia a awm te hi an la thlahlel ni mai te hian a lang. Lammual hmang hian an inti lal a. Anmahni duhsak zawng an hman tir a. Mipuiin an mamawh em em laiin an officer nupuite evening walk duh vang ringawt ten mipui programme an cancel chang te pawh a awm nia sawi a ni a. Heti lutuk a inlulin hi chu hun lokal lehzel turah anmahni tan hian boruak hrisel lo awm palh a hlauhawm a. Chuvangin insawn tumna rilru neiin hma la vat teh se. Tuna lungawi taka kan inthen theih laia an insawn duh loh chuan nakinah hian inhmuthiam lo takin, loh theih lohna avanga an insawn leh si hunte hi a awm palh ang tih a hlauhawm ta mang e.